1911 шықәса инаркны 1921 шықәсанӡа ф-класск рыла ишьақәгылаз апринц Ольденбургски иприут акәхеит. Анаҩстәи ҩышықәса раан Гагратәи жә-класск змаз школхеит. 1933 шықәса инаркны 1946 шықәсанӡа Гагратәи абжьаратәи ашкол ахьӡын, анаҩс аурыс школ ҳәа.
Аџьынџьтәылатәи еибашьра Ду ашықәсқәа раан ари ахыбраҿы иаартын агоспиталь. Аамҭала ари ашкол аҿы иҟан ақырҭуа педагогикатә ҵараиурҭа. 1947 шықәса инаркны 11 класс аҵарахьы ииасит. 1963 шықәсазы иара шьақәгылеит ҩ-школк рыла - 2-тәи 4-тәи. Аха 4-тәи ашкол азы ахыбра андыргыла нахыс иара инагӡаны 2-тәи аурыс школны иҟалеит. 2003 шықәса инаркны Гагратәи 2-тәи аурыс школ ихьӡ ахуп Асовет Еидгыла ҩынтәны Афырхаҵа Витали Попков.
Аиубилеитә хәылԥазы иаҭааз зегьы бзиала шәаабеит ҳәа раҳәо ашкол ашҭаҿы шәаҳәаралеи кәашаралеи ирԥылеит. Анаҩс дара нарыԥхьеит аибашьреи аџьеи рмузеи ахь. Ахәылԥаз иацҵан акттә зал аҟны. Араҟа иҩнагалан Аԥсни, иара убас ари ашколи рбираҟқәа. Аҵаҩцәа еиҭарҳәеит ашкол ашьақәгылашьа аҭоурых.
Аиубилеи иаҭааз асасцәа зегьы бзиала шәабеит ҳәа ралҳәеит ашкол адиректор Изабелла Ажьиԥҳа, иалылкааит ацхыраара рызҭо зегьы.
Ашкол еиуеиԥшым ашықәсқәа раан напхгара арҭон Михаил Кәпалба, Алеқсеи Гериа, Леонти Ҷантуриа, Асҭамыр Лакербаиа. 1995 шықәса инаркны 2010 шықәсанӡа ашкол еиҳабыс дыҟан еицырдыруа аматематика арҵаҩы Аделаида Қапԥҳа.
Ари аҽны иргәаладыршәеит арҵаҩратә ус акыр иазааԥсахьаз, насгьы шықәсырацәала уаҟа аус зуаз арҵаҩцәа, Аԥсны Аџьынџьтәылатә еибашьраан иҭахаз ашкол аушьҭымҭацәа, изаамҭанымкәан зыдунеи зыԥсахыз аветеранцәа.
Иахьа Витали Попков ихьӡ зху Гагратәи абжьаратә аурыс школ №2 – ари зыҩаӡара ҳараку, 50-ҩык инарзынаԥшуа арҵаҩцәа аус ахьыруа еилазаароуп. Араҟа аҵара рҵоит 820-ҩык аҵаҩцәа.
Араион ахада Иури Ҳагәышь ихьӡала адныҳәалара ҟаиҵеит актәи ихаҭыԥуаҩ Адамыр Ҵышәба.
Иара убас ашкол анапхгара лымкаала иҭабуп ҳәа ралҳәеит Гагра аҵара аҟәша аиҳабы Мадина Ажьиԥҳа.
Асасцәа идырбан ашколхәыҷқәа рымч ала еиҿкааз ашәаҳәаратә, акәашаратә қәгыларақәа.
Аманда Анталаа
