Арԥыс иигаз аиааира идиныҳәалеит, изеиӷьишьеит ҳаԥхьаҟагьы ақәҿиарақәа, иагьазгәеиҭеит ари еицырдыруа ателехәаԥшратә проект аҟны акыраамҭа ҳаззыԥшыз аԥсуа школҷкәын раԥхьатәи ииааира шакәу.
Нестор Ҭарба А.С.Пушкин ихьӡ зху Аҟәатәи абжьаратә школ №2 ажәеизатәи акласс аҟны аҵара иҵоит. Нестор дахыԥхьаӡалоуп жәларбжьаратәи аизыҟазаашьақәа Москватәи рҳәынҭқарратә институт.
Аҵара аминистр гәазыҟаҵарак аҳасабала Нестор Артек дшишьҭуа иеиҳәеит, ҳамҭас ииҭеит ҩ-томк иҟоу Иаазыркьаҿу аенциклопедиа «Аԥсны», иара убас атехника аахәаразы 50 000 мааҭ асертификат.
Нестор далацәажәеит ахәмарра шымҩаԥысуаз, иара убас ҳаԥхьаҟатәи ипланқәагьы дырза­аҭгылеит. Аҵыхәтәантәи ахә­ма­рраан иалахәыз рҭак ҟарҵон «Ажә­ытәӡатәи аамҭақәа инадыркны Аџьынџьтәыла ахьчаҩцәа» атемала азҵаарақәа. Нестор ииашаны рҭак ҟаиҵеит Пиотр Актәи, Тегерантәи аконференциеи ирызкыз азҵаарақәа.
Уаҩы дзеигәырӷьаша хҭысуп, аҵыхәтәантәи ашықәсқәа ры­ҩнуҵҟала Аԥсны аҿар еиуеиԥшым аспорт хкқәа рганахьала ақәҿиарақәа ахьаадырԥшуа. Уажәы аҵарадырра аганахьала урҭ днарыцлеит Нестор Ҭарба.