Аҳәынҭқарратә бираҟ аныҩнаргала ашьҭахь ажәа иманы дықәгылеит Жәлар Реизара Аиҳабы Лаша Ашәба. Уи еизаз идирдырит агәырӷьаратә еилатәара зхы алазырхәырц Аԥсныҟа иааз асасцәа.
Аԥсны Аҳәынҭқарра Ахадас иалху Бадра Гәынба, Аконституциатә усӡбарҭа аусзуҩцәа шыҟоу, Аԥсны Аҳәынҭқарра Аконституциа атекст инапы нақәҵаны, Аԥсны жәлар рҿаԥхьа ҭоуба иуит.
"Ҭоуба зуеит, сымч-сылша, схы-сыхшыҩ, сыԥсҭазаара зегьы Сыԥсадгьыл, сыуаажәлар рымаҵ аура ишазыскуа, сыжәлар ирымҭаны снапаҿы иҟало амчра ҳҳәынҭқарра Аконституциа, иахьатәи уи амш, уаҵәтәи уи аԥеиԥш рыхьчараз схы ишасырхәо. Жәлар рылахь соуааит иԥшьоу абри ахықәкы сацәхьаҵны саныҟала. Иа Анцәа Ду, суҳәоит Сыԥсадгьыли сыуаажәлари рымаҵ аураҿы амчи алшареи суҭарц!". ‎

Бадра Гәынба ҭоуба анышьҭеиҵа ашьҭахь иадырҳәеит Аԥсны Аҳәынҭқарратә Гимн. Анаҩс Жәлар Реизара Аиҳабы Лаша Ашәба Аԥсны Ахадас иалху Бадра Гәынба инапы иаиркуеит Ахада имчра атрибутқәа - Аԥсны Аҳәынҭқарра Абираҟ,Аԥсны Аҳәынҭқарратә Герб асахьа зну, "Аԥсны Аҳәынҭқарра Ахада" ҳәа аҩыра зну амҳәыр, иара убас Арбџьар мчқәа ркомандаҟаҵаҩ хадак иаҳасабала Ахада иҵакы иахаҿроу аҳәа, аԥсуа лабашьа-аҟәыӷареи ахачҳареи ирсимволу. ‎

Аҳәынҭқарра Ахада инапынҵақәа рынагӡарахь инеира иазку агәырӷьаратә еилатәара иалахәын Аахыҵ Уаԥстәыла Ахада Алан Гаглоев, Урыстәылатәи Афедерациа Ахада Иусбарҭа анапхгаҩы актәи ихаҭыԥуаҩ Сергеи Кириенко. Урыстәылатәи Афедерациа асубиектқәа рхадацәа, Урыстәылеи, Аахыҵ Уаԥстәылеи, Никарагуеи рҟынтәи ацҳаражәҳәаҩцәа. Иара убас Приднестровиатәи Молдавиатәи Ареспублика ахаҭарнакцәа уҳәа аӡәырҩы.

Шьарида Торчуа