Аԥсны аҿари аспорти русқәа рзы Аҳәынҭеилакы аԥхьахә ҷыда «Агәыӷра» занашьаз Сандро Цымцба, 15-16 ш. зхыҵуа арԥарцәа рыбжьара, ақ. Москва аԥхьахәгара иазкны имҩаԥгаз аиндаҭларақәа рҟны, Умалат Гусеинови иареи реиԥылараҿы, лыҵшәа ҳаркыла ахьтәы медал даԥсахартә илшарақәа ааирԥшит.
Иара убас, М. Чачба ихьӡ зху Гәдоуҭатәи ахәыҷтәы-қәыԥштә спорттә школ абокс азыҟаҵаҩцәа Аслан Ахбеи Едуард Депелиани рааӡамҭа, иахьа Санкт-Петербург «Аолимпиатә гәыӷрақәа рышкол» аҟны Игор Сидоренко инапхгарала зыбҩарҵәыратә ҟазара еиззырҳауа Константин Ахбагьы 15-16ш. зхыҵуа, зыкапан 60 кь. иреиҳам ақәыԥшқәа рыбжьара, ақ. Санкт-Петербург аԥхьахәгара иазкны имҩаԥысуаз аиндаҭларақәарҟны ахьтәы медал даԥсахеит. Ари аиааирала иагьилиршеит Урыстәыла аԥхьахәгара иазкны, Суздаль ақалақь аҟны, апрель 2-12 рзы имҩаԥысраны иҟоу аиндаҭларақәа аҽрылархәра.
Зҭачкәымҟьара маншәалахаз аԥсуа арԥарцәа дреиуоуп, шәи ҩынҩажәаҩык инарзынаԥшуа 15-16ш. иреиҳам абоксиорцәа-қәыԥшцәа еидызкылаз, Урыстәыла Аладатәи афедералтә округ аԥхьахәгара иазкны, Маиҟәаԥ имҩаԥысуаз аиндаҭларақәа рҟны, х-ҩык зықәлацәа ҟазарыла ираԥганы ахьтәы медал зҽаԥсазтәыз, мышқәак раԥхьа Краснодартәи атәылаҿацә аԥхьахәгараҟны аџьаз медал занашьахахьаз Инал Хәырхәмал. Ари аихьӡара Инал алшара инаҭоит, иун 19-29 рзы Урыстәыла аԥхьахәгаразы, Сыктывкар имҩаԥысраны иҟоу аиндаҭларақәа аҽрылархәра.
Аԥсуа ҭачкәымҟьаҩцәа қәыԥшцәа аԥхьаҟагьы аихьӡара ҳаракқәа рзеиӷьашьо, гәрагарала иаҳҳәарц ҳалшоит ари аспорт хкы аҟны зыхьӡ ахара инаҩхьоу Аԥсны аҵеицәа Давид Аршба, Саид Смыр, Нарҭ Сангәлиа, Рустам Аиба, Аслан Ахба, уҳәа жәпаҩык рықәҿиарақәа ишреиҵамхо.
