Аԥсны Ахада инапынҵақәа назыгӡо Бадра Гәынба иазгәеиҭеит аҳаиртә баӷәаза хықәкыла аиҭашьақәыргылара иаҿу ауаа рҿаԥхьа ишықәгылоу ауснагӡатә дуқәа. Маи 1 азы иалагатәуп Урыстәылатәи Афедерациеи Аԥсны Аҳәынҭқарреи ҳаирла реимадара.
«Аҳаиртә баӷәаза аиҭакра ин­ақәыршәаны имҩаԥыргоз аусурақәа иҵабыргыҵәҟьаны даара рымҽхак дууп. Ари Аԥсны иахьаҵанакуа инарыгӡо аинфраструктуратә проект ӷәӷәоуп. Аҵыхәтәантәи 30 шықәса рыҩнуҵҟала аиԥш-зеиԥшу апроектқәа ыҟамызт», – иҳәеит Гәынба. Уи ҭабуп ҳәа реиҳәеит апроект анагӡара хықәкыла иалахәыз зегьы.
«Ахыркәшарахь ҳхы ҳархеит. Иахьа ҳҿаԥхьа ишьҭоуп ианаамҭоу авиаеимадара ахацыркразы усқәак рылацәажәара», – иҳәеит Нанба. Аусурақәа зегьы мҩаԥысуеит ишьақәыргылоу апланқәа инарымаданы, адырраҭара ҟаиҵеит Аԥыза-министр актәи ихаҭыԥуаҩ, аенергетикеи атранспорти рминистр Џьансыхә Нанба.
Уи иара убас иҳәеит маи азы иааиԥмырҟьаӡакәа авиаеимадара ахацыркра иаԥырхагахаша акгьы шыҟам, ицәырҵуа азҵаарақәа ишрылацәажәо, рҭыԥ ишықәырҵо.
Маи азы аҳаиртә баӷәаза мазеихоит аҳаирпланқәа рыдкыларазы, – иҳәеит В.Г.Арӡынба ихьӡ зху Жәларбжьаратәи аҳаиртә баӷәаза «Аҟәа» адиректор хада Евгени Баженов. Уи иазгәеиҭеит алашарарбагатә шьақәгылақәа реибыҭаразы аусурақәа шхыркәшоу.
«Ҳазну аамҭазы фымцала аиқәыршәаразы, иара убас аҳаиртә баӷәаза асертификациазы аусурақәа ирҿуп. Маи азы аҳаирпланқәа рыдкыларазы имазеихоит», – иҳәеит иара.