Аминистрцәа Реилазаара апресс-маҵзура излаанацҳауа ала, акомиссиа иалоу иазырыӡбеит Аԥснытәи аҳәынҭуниверситет астудентцәа рзы Владислав Арӡынба ихьӡ зху астипендиа аԥҵара, Аԥсни уи анҭыҵи агәалашәаратә усмҩаԥгатәқәа реиҿкаара, Раԥхьатәи Ахада Ифонд аҟны Раԥхьатәи Ахада иофициалтә саит аԥҵара. Аҟәа ақалақь ахадара аиҳабы Беслан Ешба ирылеиҳәеит асаит аԥҵара ԥарала аиқәыршәара хаҭала ихашҟа ишиго.
Акомиссиа иалоу иара убас иазырыӡбеит Владислав Арӡынба иорден аԥҵаразы ажәалагала нарышьҭырц Жәлар Реизара ашҟа.
Аилатәара иалахәыз рылацәажәеит аиубилеитә шықәса аҩнуҵҟала имҩаԥысуа агәалашәаратә усмҩаԥгатәқәа реиҿкаара иазку егьырҭ азҵаарақәагьы.
Урҭ рхыԥхьаӡараҿы иҟоуп Аԥсуаҭҵааратә институт аҟны жәларбжьаратәи аҭҵаарадырратә конференциа амҩаԥгара, В.Арӡынба иусумҭақәа рҭыжьра, Раԥхьатәи Ахада изку афильмқәеи ателедырраҭарақәеи разырхиара.
