19 шықәса ирҭагылоу аԥсуа спортсменка Ерика Кәарҷиа-ԥҳа дхәыҷаахыс дзызҿлымҳау, лыхгьы ззылкыз аспорт, аԥхьаҟагьы ҵарадыррала аизырҳара хықәкыс ишьҭыхны дҭалеит аспорт азанааҭ ала, Ҟәбантәи Аҳәынҭқраартә университет. Уажәы уи ахԥатәи акурс аҟны афизикатә культура афакультет аҟны аҵара лҵоит. Аҵареи аҽазыҟаҵарақәеи еилалыгӡоит. Аҭыԥҳа шамахамзар лхы дақәиҭым, иҭацәу аамҭа лымаӡам, есҽны уи хаҭәаауп аҵареи еиуеиԥшым аҽазыҟаҵарақәеи рыла. Ашықәс ҿыц аныҳәа аламҭалазы Ерика илымаз аԥсшьарамшқәа раан Аԥсныҟа данаа ҳлыҿцәажәеит.
Ихәыҷаахыс аспорт иазҿлымҳау, уи иадҳәалоу аԥсуа ҭыԥҳа ҳаиҿцәажәара хацыркуа иазгәалҭеит, 6 шықәса анылхыҵуаз акәашара бзиа ишылбоз, амилаҭтә кәашара аҵаразы аныҟәарагьы дшалагаз. Аха анаҩс аспорт, хаҭала аԥқьаҭ агәыбылра шьҭылкааит.
«Саныхәыҷыз, аҩны аԥқьаҭ стол ҳаман, сашьцәа еиҳабацәа еснагь аԥқьаҭ иасуан. Саргьы уи аинтерес шьҭысхит, срыцаслон, аха усҟан урҭ сзыриааиуамызт, агәаҳәара сыман сашьцәа аҵасырхартә сиааиларц азы. Ус аԥқьаҭ ахь исымаз азҿлымҳара, агәыбылра еиҳа иазҳауа, иӷәӷәахо иалагеит. Уажәы уи сара сзы зегь реиҳа ихадароу, раԥхьа игылоуп, сыԥхыӡ иалоуп. 8 шықәса анысхыҵуаз Кама Адлеи-ԥҳа агәыԥ еизылгон, саргьы уахь салалеит. 9 шықәса схыҵаанӡа амилаҭ кәашареи аспорти еиласыгӡон, нас аспорт аԥыжәара агеит, акәашара аансыжьит», – дҳацәажәон уи.
Ерика лажәақәа рыла, Аԥсны анҭыҵ имҩаԥысуаз аспорттә еицлабрақәа руак аҟны аҟыбаҩ ҷыда злаз аӡәы шлакәыз гәаҭаны, даликааит Урыстәыла зҽаԥсазтәыз азыҟаҵаҩ Виктор Поликарп-иԥа Павленко, ааԥхьарагьы лиҭеит Самаратәи аобласт еизгоу акомандахь. 16 шықәса лхыҵаанӡа ари акоманда ахьӡала дықәгылон, еиуеиԥшым аицлабрақәа, атурнирқәа рҟны акырынтә аԥхьахәқәагьы лгахьан.
Аспортсменка лхы злалырхәхьоуи аиааирақәа ахьылгахьоу аицлабрақәеи, атурнирқәеи, ачемпионатқәеи маҷым, аха хаҭала, лара лзы еиҳа аҭыԥ ҷыда аанызкыло хазы дырзааҭгылеит:
– Даара акрызҵазкуа турнируп сара сзы аҩбатәи аҭыԥ ахьааныскылаз «Топ 12 сильнеиших в России», иара убас, 70 инарзынаԥшуа Урыстәыла ақалақьқәа рҟнытә излахәыз Урыстәыла ачемпионат алахәхара. Еиҳа иалукаауа акы акәны иҟоуп, 16 тәыла злахәыз, хаҭала, сара Аԥсны ахьӡала ақәгылара ахьсаҭәашьахаз «Восточная Европейская лига». Араҟа ахәмарра даара иуадаҩын, сызцыхәмаруаз акитаи ҭыԥҳа даара иазыҟаҵаз, иӷәӷәаз еиндаҭлаҩын, аха сара исылшеит уи лиааира, даара иуадаҩзаргьы актәи аҭыԥ агара. Брикс жәларбжьаратәи ачемпионат, акыр атәылақәа злахәыз ахәмарра Брикс аҟны, Европеи Индиеи рчемпионкеи сареи ҳаиндаҭлон, даара иуадаҩын ахәмарра, иӷәӷәаз, азыҟаҵара бзиа змаз ландаҭлара, аха алахәхарагьы иааироуп сара сзы.
11 шықәса анылхыҵуаз аахыс зхықәкы анагӡаразы Урыстәыла иҟоу аспортсмен, аԥсуа ҭыԥҳа дхәыҷнаҵы, дашьцылаанӡа зны лан Илона Барганџьиа-ԥҳа длыцын, зны лаҳәшьа еиҳаб Саида Кәарҷиа-ԥҳа. Лҭаацәа зегьы аџьабаа лыдырбалеит, уажәгьы гәцаракрыла илзыҟоуп. Аха лымкаала Ерика лаб ибзоуроу рацә́оуп.
»Аспорт даара аитерес зҵоу занааҭуп, аха уаҟа еснагь аиааира залшом, зны уаҵахоит, зны аԥхьахә угоит. Хаҭала, сара аспорт аханатә азхьаԥшреи, аҽазкреи, ахықәкы анагӡареи рҿы зегь рыла сгәы азҭазҵо, исабжьо иарбан усзаалак аҿы исыцхраауа, исывагыло саб Роман Кәарҷиа иоуп. Зегь раԥхьаӡагьы уи иоуп изыбзоуроу сара аспорт аганахьала исымоу аихьӡарақәа», – лҳәеит аспортсмен қәыԥш лаб дизгәдуны.
Ҳәарада, Ерика лҟыбаҩ, ахырхарҭа алхраҿы лбаҩхатәра амҩа аҭараҿы лаб Роман адгылареи ацхыраареи ҟаиҵеит, аха уи аӡыргара, арҿиара аҭара, аихьӡарақәа реизырҳара рыбзоурахеит аспорт азҟазацәа, Ерика лазыҟаҵаҩцәа.
«Саб ишьҭахь, даара исзааигәоу уаҩны исыԥхьаӡо аханатә аспорт ахь раԥхьатәи сшьаҿақәа реихгараҿы сымҩақәызҵаз, сеихьӡарақәа зыбзоуроу раԥхьатәи сазыҟаҵаҩ, иахьагьы исызҿлымҳау, исҩызаны инхаз Аԥсны зҽаԥсазтәыз азыҟаҵаҩ Беслан Қарчаа зегь раԥхьа схаҿы дааиуеит сазыҟаҵаҩцәа анысгәаласыршәо. Азыҟаҵаҩцәа рганахьала сара насыԥ змоу уаҩны схы сыԥхьаӡоит. Сыԥсҭазаараҿы урҭ рацәаҩуп, досу дара рҭыԥгьы рымоуп. Аха иалкааны зыӡбахә сҳәар сылшо, хаҭала, сара сеизҳараҿы зџьабаа рацәоу ируаӡәкуп Урыстәыла зҽаԥсазтәыз азыҟаҵаҩцәа Виктор Павленкои Вадим Крылови. Виктор Павленко зыбзоурала аханатә Самаратәи еизгоу акомандахь ааԥхьара соуз иоуп. Вадим Крылов иахьа азыҟаҵаҩыс исымоу, Урыстәыла иреиӷьӡоу азыҟаҵаҩ ҳәа иԥхьаӡоу, зусушьеи зтеориеи ҿырԥшыгоу, зусеицура маншәалоу, имариоу иоуп» – абасала дрызгәдуны лазыҟаҵаҩцәа рыбзырӡы далацәажәон аԥқьаҭ асҩы.
– Жәларбжьаратәи акласс змоу аспорт азҟаза ихьӡ аиура бара бзы иаанагои? Илаҳҭаз азҵаара аҭак ҟалҵоит: «Ари ахьӡ аиура ус имариам, даара аџьабааи аԥышәеи аҭахуп. Хаҭала, сара саԥсаны, исықәнаганы исоуит ҳәа сыԥхьаӡоит. Сыззыԥшымыз, аха даара ихадоу, иреиӷьоу ҳамҭаны исыдыскылаз, агәахәара ду сызҭаз ак ауп. Амала, ари ахьӡ аиура, аԥсахара аҿы аангылара ҟалаӡом, еиҳагьы аҭакԥхықәра уднаҵоит. Убри аҟнытә, сара аԥхьаҟагьы сҽазысшәоит иреиҳау Аиааирақәа ргара», – лҳәеит уи.
Ҳәарада, ари ахьӡ ҳаракы аиуразы аетапқәа ирацәаны ирхыстәуп. «Лучший игрок года среди девушек 2024» аҟны аиааира илгаз иалҵшәахеит ари ахьӡ ҳаракы.
Ерика Кәарҷиа-ԥҳа лхықәкы анагӡаразы ааԥсарак лынмырԥшкәан лхы аџьабаа адылбалоит, еилалгӡоит лзанааҭ ала аҵареи аҽазыҟаҵарақәеи.
Аԥхьаҟа агәҭакқәагьы маҷымкәан илымоуп. Ҳаиҿцәажәараан урҭ ҳацеиҩылшеит: – «Март мзазы имҩаԥысраны иҟоу Урыстәыла ачемпионат алахәхара даара агәазыҳәара сымоуп. Уи алахәхаразы иалԥшаау атур сахысроуп. Анаҩс, сымҩа еиҳагьы иаатуеит, Европа ачемпионат ахь анеирагьы аԥхьаҟа сазхәыцуеит, ҳәарада, нас аолимпиада аҽалархәра. Уи азы иаҭахуп аҽазыҟаҵара, аусура, аԥышәа арҳара.
Аԥқьаҭ асра ахырхарҭала Аԥснынтәи иаӡәыку Ерика Кәарҷиа-ԥҳа ҳаиҿцәажәараан ҳзеигәырӷьашаз, иагьџьаҳшьашаз ажәабжь ҳалҳәеит, лҵара аныхлыркәшалак ашьҭахь, Аԥсныҟа ахынҳәра лгәы ишҭоу, лара дызҿу аус аҿиара аҭара шылҭаху ала.
Аиашазы, иахьа Аԥсны анҭыҵ аҵара зҵо, шамахамзар, рҵара аныхдыркәшалак ашьҭахь ихынҳәуа маҷуп, аԥхьаҟа аперспектива ахьырбо, иахьеиздырҳауа иаангылоит, Аԥсны алшарақәа ҟәыншьаны. Аха аспортсменка қәыԥш «Аԥқьаҭ ҳтәылаҿы ихьысҳауп, арҿиара аҭатәуп, еизырҳатәуп, аҟыбаҩ змоу, абаҩхатәра змоу аҿар рхы аадырԥшыртә аҭагылазаашьа рыҭатәуп. Аспорт агәабзиара азы ихадароуп, хаҭала, аԥқьаҭ ауаҩы маха-шьахала аӷәӷәареи, деилҟьа-еилӷәыцә ишьақәгылареи инарҷыдангьы иблабареи ихәыцра арҿиареи ирзеиӷьуп. Убри инамаданы гәҭакыс исымоуп схатәы спорттә школ аиҿкаара. Сзанааҭ излаҳәо ала рҵаҩык, зыҟаҵаҩык иаҳасабала аусура инаҷыдангьы азин сымоуп аспорт аусбарҭа аганахьала аусура» – лҳәеит уи.
Илзеиӷьаҳшьап, нас Жәларбжьаратәи акласс змоу аспорт азҟаза Ерика Кәарҷиа-ԥҳа лнапы злаку аус аҿы иреиҳау аихьӡарақәеи агәыхәтәхьӡареи.́
Алиса Гәажә-ԥҳа
