Рхы иадырхәо афымцамч ахәшәаразы азинмч змоу аусбарҭақәеи аиҿкаарақәеи русура алҵшәа ахьамам ҳасаб азуны, уи ахырҳара ашьҭыхразы ақәҵара рыдыркылеит. Уи инақәыршәаны 2025 шықәса ианвар 1 инаркны апрель 1 азынӡа иаанкылоуп  афымцамч ахә ашьҭыхра.

Ареспубликатә унитартә наплакы «Амшынеиқәафымцамчи» амуниципалтә наплакы «СУЕС-и» рнапы ианҵоуп 2025 шықәса ианвар 1 инаркны апрель 1 азынӡа рхы иадырхәаларц 2024 шықәсазы ишьақәыргылаз афымцамч ахәԥсақәа.

Аенергетикеи атранспорти Рминистрра иадҵоуп мчыбжьык аҩнуҵҟала Аминистрцәа Реилазаара азинԥҟарақәа абри аусԥҟа иақәшәо рыҟаҵаразы ажәалагалақәа рнагара, иара убас есымчыбжьа адырра ҟанаҵаларц афымцамч коммерциала аашьҭразы иҟоу амалқәа рганахьала.

Абри аусԥҟа анагӡара ахылаԥшра идҵоуп Аԥыза-министр актәи ихаҭыԥуаҩ инапынҵақәа назыгӡо, аенергетикеи атранспорти рминистр Џьансыхә Нанба.