Арҭ аусмҩаԥгатәқәа мҩаԥысит Шотландиа иҟоу Аԥсны Ахәаахәҭра-ааглыхратә палата аофициалтә хаҭарнак, аамҭак ала Британиатәи аилазаара «Астериа» ахада, аԥсуа проект ҿыц - «А-Каникулы» аԥҵаҩы Риҵа Анқәаб лнапхгарала.
«Аԥсуа хәылԥазқәа» аҳәаақәа ирҭагӡаны Аԥсны Ахәаахәҭра-ааглыхратә палата ирыднагалаз Аԥсны иазку англыз бызшәала афильми Аԥснытәи аҭыжьыҩцәа раалыҵ –иџьбароу арыжәтә хкқәа, ақыҭанхамҩа аалыҵқәа, аԥсуа чыс хкқәа уҳәа ргьама абара зцыз Апалата апроект «Агастрономиатә Аԥсны» аӡыргара еиҿкаан.
Имҩаԥган иара убас Аԥсны аҭыԥ ԥшӡарақәа, абзазара, атрадициақәа ртәы зҳәо афотоцәыргақәҵа.
Аҩ- хәылԥазык ирҭааит ақалақьқәа рхадарақәа рхаҭарнакцәа, ауниверситетқәа рырҵаҩцәа, абизнесуаа, ашәҟәыҩҩцәа, аса­хьаҭыхыҩцәа, артистцәа уҳәа аӡәырҩы.