Ашықәс ҿыц аҭалара мышқәак шагу, Аԥсны амҩадуқәеи, адәқьанқәеи, асасааирҭақәеи, ахәаахәҭратә ҩнқәеи рҿы ашықәсҿыцазтәи арԥшӡагақәа рыла идырхиоит. Иара уи алагьы ауааԥсыра ргәы шьҭнахуеит. Идыру усуп, есышықәса Аҟәа ақалақь Ахақәиҭра ашҭаҿы Аԥсаӡ шдыргыло. Аха, сынтәа, уи аргылареи, арԥшӡареи, аартреи  шыҟало еилаҳкаарц  ҳлыҿцәажәеит Аҟәа ақалақь Ахадара акультура  аҟәша аиҳабы Наала Ҳашыг. Уи лажәақәа рыла, сынтәа еиуеиԥшым амзызқәа ирыхҟьаны, маҷк иахгахеит Аԥсаӡ хада аргылареи аартреи. Аха, егьа ус иҟазаргьы, зегьы згәы хыҭ-хыҭуа иззыԥшу Ахақәиҭра ашҭаҿы иргылоу  Аԥсаӡ хада аартхеит декабр 25 рзы.

Уи аартраҿы, ақалақь уааԥсыра дрыдныҳәалеит Аҟәа ақалақь ахада Беслан Ешба, ирзеиӷьеишьеит агәабзиара, агәамч, аманшәалара, аҭынчра! Аныҳәатә концерт иалахәын еиуеиԥшым ахәыҷтәы ансамбльқәа, аԥсуа естрадатә шәаҳәаҩцәа: Нарсоу Абыхәба, Сати Какәыбаа, Саида Габниа, Рамина Заде уҳәа егьырҭгьы.

 Аԥсаӡ рхиоуп аҟаԥшьи ахьтәи аԥшшәқәа рыла. Егьырҭ ашықәсқәа раасҭа ахархәара аиуит акупол  ду. Аԥсаӡ хада акәша-мыкәша рхиоуп еиуеиԥшым  аперсонажқәа рсахьақәа рыла. Ахәыҷқәа ракәзар, ргәылаҟазаара шьҭырхуан хыԥхьаӡара рацәала ақьачақьцәа.  Иара убас иргылоуп асцена, аҩны хәыҷқәа. Ахәаахәҭратә  џьармыкьа аус аулоит  декабр 25 инаркны  ианвар 13-нӡа.

Иара убас дазааҭгылеит, еышықәса еиԥш, сынтәагьы  8–ҳаблак рҟны ахәыҷқәа рзы Аԥсаӡқәа шдыргылаз. Уаҟа ахәыҷқәа ирыҭахоит аҳамҭақәа. Ахәыҷқәа ргәы ашьҭыхразы аниматорцәа апрограмма мҩаԥыргоит.

Н. Ҳашыг Ашықәс ҿыц аҭалара Аԥсны жәлар зегьы дрыдныҳәало, ирзеиӷьалшьеит агәабзиара, аҭынчра, агәалаҟазаара бзиа!

Стелла Сақаниа