Адышшылараҿы иазгәаҭоуп:
«Аԥсны Жәлар Реизара адепутатцәа 2024 шықәса декабр 19 азы трагедиала иҭахаз адепутат Вахтанг Владимир-иԥа Голанӡиа иҭаацәа зықәшәаз агәаҟра ду рыцеиҩыршоит, иҭаацәеи игәакьацәеи ирыдышшылоит.
Ҳара даҳцәыӡит Аԥсны атәылауаҩ, апатриот, агәыҭбаа зызҭаз, доҳамчла иӷәӷәаз, зажәеи зуси еицнагаз ауаҩы.
В.В. Голанӡиа диит 1969 шықәса сентиабр 16 азы Очамчыра араион Кәтол ақыҭан, далахәын 1992-1993 шықәсқәа рзы Аԥсны жәлар Рџьынџьтәылатә еибашьра, далан агәыԥ «Дельфин». Ҩынтә дырхәхьан, иааирԥшыз ахаҵареи агәаӷьреи рзы ианашьан «Агәымшәаразы» амедал.
Вахтанг Гәаланӡиа еснагь агәра игон иԥсадгьыл ихьыԥшымкәа, ишәҭыкакаҷуа ҳәынҭқарраны ишыҟалоз. Иуадаҩыз аибашьрашьҭахьтәи ашықәсқәа раан иҩызцәа, игәакьацәа иваргыланы, анападкыларатә усура иҽазикит, еиҿикааит ахырхарҭа рацәа змаз абизнес, шәҩыла усурҭа ҭыԥла еиқәиршәеит.
2022 шықәсазы Вахтанг Владимир-иԥа Кәтолтәи алхырҭатә ҭыԥхада ала Аԥсны Жәлар Реизара абыжьбатәи ааԥхьара адепутатс далхын.
В.В.Голанӡиа активла далахәын Жәлар Реизара аусура, ҭакԥхықәрала дрызнеиуан инапы ианыз аусқәа. Уи изанааҭдырреи иԥсҭазааратә ԥышәеи ааԥшит аекономикатә политикеи, ареформақәеи, аинформациатә технологиақәеи реилак аҿы, иара убас аграртә политикеи, аԥсабаратә ресурсқәеи, аекологиеи реилак аҟны иусураан. Иҩызцәа иазгәарҭон азакәанԥҵаратә аԥшьгамҭақәеи хра злоу атемақәеи рылацәажәара ишәаны-изаны дышрызнеиуаз. Вахтанг Владимир-иԥа ҟазшьас иман агәаартра, аџьабзиабара, ахамеигӡара.
Вахтанг Владимир-иԥа алагаламҭа ҟаиҵеит жәларбжьаратәи апарламентбжьаратәи аимадарақәеи аџьынџьуаа рҟны аимадарақәеи рырӷәӷәаразы Жәлар Реизара аусураҿы. В.Гәаланӡиа дрылахәын Москва имҩаԥысыз Беларусиеи Урыстәылеи Реидгыла Апарламенттә Еизара аилатәара, 2024 шықәсазы Ареспублика Калмыкиа иҟаз Алада-Урыстәылатәи Апарламенттә ассоциациа аконференциа аусура. 2023 шықәсазы иҩызцәа адепутатцәеи иареи ацхраауан Шьамтәылеи Ҭырқәтәылеи рҟны адгьылҵысра аԥхасҭа знаҭаз ацхыраара рыҭара азҵаарақәа рҭыԥ рықәҵара.
Вахтанг Владимир-иԥа Гәоланӡиа ҳгәалашәараҿы наунагӡа даанхоит ҳаҭыр зқәыз, зымч-зылша иамеигӡоз, дыррала еибыҭаз уаҩны.
