Ашәҭқәа рышьҭаҵараан иҟан Аԥсны Ахада инапынҵақәа назыгӡо Бадра Гәынба, Аԥсны акультура аминистр инапынҵақәа назыгӡо Динара Смыр.
Анаҩс аусмҩаԥгатә иацҵан Д. И. Гәлиа ихьӡ зху Аԥсуаҭҵаара аинститут аҟны.
Аинститут авестибиуль аҟны Д. И. Гәлиа ибиусҭ аартрахь инеит аиубилеитә усмҩаԥгатәқәа ирылахәыз. Аиқәшәара ааиртит аинститут аиҳабы Арда Ашәба. Уи иааркьаҿны далацәажәеит Д. И. Гәлиа аԥсуа доуҳатә культураҿы илагала ду еицакра шақәым. Иазгәеиҭеит апатриарх ихьӡ зху аҭԥаарадырратә усҳәарҭаҿы игәалашәара амырӡра иадырганы ибиусҭ аартра аҵакы дуны ишахәаԥшуа.
Абиусҭ иахаршәыз ацаха шкәакәа ахырхит Арда Ашәбеи Дырмит ду имаҭа иҷкәын Дмитри Гәлиеи. Абиусҭ аартраан иқәгылеит: Аԥсны Ахада инапынҵақәа назыгӡо Бадра Гәынба, абиусҭ автор, аскульптор Амиран Адлеиба.
Иара убас Аԥсуаҭҵаара аинститут аҟны аусура иалагеит Д.И. Гәлиа ииубилеи инадҳәаланы еиҿкааз жәларбжьаратәи аҭҵаарадырратә конференциа. Аԥсуа ҵарауаа реиԥш, уи иалахәын Ставропольтәи аҳәынҭқарратә арҵаҩратә институт аҟнытә, Ҟарачы-Черқьестәылантәи аҵарауааи ашәҟәыҩҩцәеи. Зынӡа Урыстәылантәи раара азгәаҭан ҩеижәихәҩык рҟынӡа. Изымааз онлаин аҟазшьала аконференциа рҽалархәра азгәаҭан.
Аконференциа аартуа дықәгылеит аинститут аиҳабы Арда Ашәба. Азҿлымҳара бзиа зауз ажәахәқәа ҟарҵеит: Аԥсны аҭҵаардыррақәа Ракадемиа ахада Зураб Џьапуа, Владимир Занҭариа, Уасил Аҩӡба, аҵарауаҩ Аишьаҭ Ӡыба, жәлар рпоет имаҭа иҷкәын Дмитри Гәлиа уҳәа егьырҭгьы.
Ахәылԥаз С. И. Ҷанба ихьӡ зху Аԥсуа ҳәынҭқарратә драматә театр аҟны имҩаԥысуан аиубилеи иазкыз агәырӷьаратә еилатәара. Уахь ииасаанӡа атеатр авестибиуль аҟны Д. И. Гәлиа имемориалтә музеи аусзуҩцәа рыбзоурала еиҿкаан ацәыргақәҵа. Араҟа иӡырган амузеи аусзуҩцәа еиқәдыршәаз афотоальбом «Абри соуп сара».
Азал хада ашҟа ианиас, еизаз рҿаԥхьа дықәгылеит Аԥсны Ахада инапынҵақәа назыгӡо, Д. И. Гәлиа изку аиубилеитә усмҩаԥгатәқәа реиҿкааразы аҳәынҭқарратә комиссиа ахантәаҩы Бадра Гәынба. Зиубилеи азгәарҭоз аԥсуа литература, инеизакны адоуҳатә культура арҿиараҿы илшамҭақәа ирзааҭгылауа иқәгылеит Аԥсны ашәҟәыҩҩцәа Реидгыла ахантәаҩы Вахтанг Аԥҳазоу, ашәҟәыҩҩцәа Рассоциациа ахантәаҩы Владимир Занҭариа, абаза поет Лариса Шебзыхәа. Ажурнал «Алашара» аредактор хада Анатоли Лагәлаа даԥхьеит Дырмит Гәлиа изикыз иажәеинраала. Анаҩс ахәаԥшцәа идырбан Дырмит Гәлиа ирҿиамҭақәа ирылху аспектакль «Иареи лареи».
В. Баалоу
