Ақәԥаразы аспорт азҟаза, ԥшьынтәны Адунеи иачемпионхахьаз, Бесик Кудухов игәалашәара иазкны абҵарамза 30 рзы ақалақь Цхьынвал аспорттә хан «Олимп» аҟны имҩаԥысит иаарту турнир.
Аспорт иазҟазаз Бесик Кудухов 2003 шықәсазы акурсантцәа рыбжьара Европа ачемпионат аҿы аиааира игеит. 2005 шықәсазы Урыстәыла еизгоу акоманда далалеит. 2006 шықәсазы Урыстәыла ачемпионат ихы алаирхәит, уаҟа араӡны медал даԥсахеит. 2007 шықәсазы ақәԥаразы Адунеи ачемпионат аҿы ахьтәы медалқәа иоуит. Иара убри ашықәсан Иван Иарыгин ихьӡ зху «Агран-при» ианашьан. 2008 шықәсазы Пекин имҩаԥысуаз Аолимпиатә хәмаррақәа ихы рылаирхәит, аџьаз медалгьы даԥсахеит. 2009 шықәсазы Урыстәыла ачемпионати Адунеи ачемпионати рҟны ахьтәы медал ианашьан, иара убасгьы Адунеизегьтәи ахраҿа азы агәыԥқәа реицлабраҟны аџьаз медал даԥсахеит. Ҩышықәса инеиԥынкыланы (2010-2011 шш.) Урыстәылеи Адунеи ачемпионатқәеи рҿы ахьтәы медалқәа ианашьан, уи иабзоураны 60 кг. рҟынӡа ахьанҭаратә категориаҿы ԥхьагылаҩыс дыҟан. 2012 шықәсазы Урыстәыла ачемпионат аҿы хәынтә аиааира игеит, уи иабзоураны Аолимпиатә хәмаррақәа Лондон имҩаԥысуаз ихы алаирхәразы алшара иоуит. 2013 шықәса абҵарамзеи-ԥхынҷкәынмзеи рзы ҩ-турнирк рҿы аиааира игеит: Сослан Андиев иаҧхьахәқәа рзы Урыстәылатәи атурнири Рио-де -Жанеиро имҩаҧысуаз Бразилиа ахраҿа агаразы аетапи рҟны.
2013 шықәсазы Бесик Кудухов 27 шықәса дшырҭагылаз амҩатә машәыр иахҟьаны дҭахоит. Анышә дамадоуп Владикавказ. Олимпиатә хәмаррақәа рҿы иааирԥшыз аихьӡарақәа рзы ианашьоуп «Аџьынџь аҿаԥхьа алшарақәа» рзы аорден I-II аҩаӡарақәа. Ари аспорттә усмҩаԥгатә рхы аладырхәит ақәԥаҩцәа Аԥснынтәи, иара убасгьы Нхыҵи-Аахыҵи Уаԥстәылеи рҟынтәи. Аицлабра мҩаԥысуан 2010-2011, 2012-2013 шықәсқәа рзы ииз арԥарцәа рыбжьара.
Ас еиԥш иҟоу аспорттә усмҩаԥгатә Аахыҵ Уаԥстәылан инеиԥынкыланы ҩышықәса ҵуеит имҩаԥысуеижьҭеи. Иара еиднакылоит аԥеиԥш змоу, зус иазҟазоу ақәԥаҩцәа. Сынтәа акәзар уи рхы аладырхәит 200-ҩык рҟынӡа аспортсменцәа.
Арҭ аицлабрақәа рҟны Аԥснынтәи ф-ҩык ақәԥаҩцәа амедалқәа ирыԥсахеит. Араӡны медалқәа ранашьан: Денис Џьопуа, Дамир Аџьиев, Алан Қапба; аџьазтә медалқәа: Амир Гогов, Данаҭ Попков, Салман Ӡыба. Урҭ зегьы амедалқәеи, аҳаҭыртә бӷьыцқәеи, ахраҿақәеи ранашьан.
Аспортсменцәа азыҟарҵоит Ҭемыр Џьопуа, Алхас Аџьынџьал, Ахра Ҵышәба.
Аҳамҭақәа ранашьара ацеремониа мҩаԥыргеит Аахыҵ Уаԥстәыла Апарламент аиҳабы ихаҭыԥуаҩ Зита Бесаева, Аахыҵ Уаԥстәыла аҿартә политикеи аспорти рзы аилак ахантәаҩы Сослан Гассиев, 2008 шықәсазы аолимпиадатә хәмаррақәа рҟны араӡны медал занашьаз Ҭаимураз Ҭигиев, адунеитәи Европатәи ачемпион Ирбег Фарниев.
Саида Ҳаразиа
