Аԥсны Алхратә закәанԥҵара инақәыршәаны, Аҳәынҭқарра Ахада изаамҭанытәиу иалхрақәа ррыцхә Жәлар Реизарала Аҳәынҭқарра Ахада изинмчы аҿҳәара ԥшьымз шыбжьоу ишьақәырӷәӷәахоит, имҩаԥгахоит Аҳәынҭқарра Ахада изинмчы аҿҳәара ахыркәшара хымз еиҳамкәа, мамзаргьы Аҳәынҭқарра Ахада изинмчы анынҵәалак ашьҭахь мызкы иахымгакәа.
Аҳәынҭқарра Ахада изинмч аконституциатә ҿҳәара нҵәаанӡа иаанижьуазар, усҟан Жәлар Реизара Аҳәынҭқарра Ахада инапынҵақәа анышьҭеиҵа амш инаркны 15 мшы иахымгакәа аҿҳәаразынӡатәи алхрақәа рымҩаԥгара арыцхә шьақәнарӷәӷәоит. Аҿҳәаразынӡатәи алхрақәа Ареспублика Аԥсны Ахада инапынҵақәа анышьҭеиҵа инаркны хымз рыҩныҵҟа имҩаԥгазароуп.
Аҳәынҭқарра Ахада Аслан Бжьаниа инапынҵақәа шьҭеиҵеит абҵарамза 19, 2024 шықәса рзы. Убас ала Аҳәынҭқарра Ахада аҿҳәаразынӡатәи иалхрақәа рымҩаԥгара арыцхә жәабранмза 19, 2025 шықәса иахымгакәа ишьақәыргылазар ауп.
Аԥсны Аконституциеи Аԥсны Ахада иалхрақәа рзы» Аконституциатә закәани инарықәыршәаны, Аҳәынҭқарра Ахадас далхзар ҟалоит милаҭла иаԥсыуоу, зхатәы бызшәа ибзианы издыруа, 35 шықәса ирхысхьоу, 65 шықәса ирҭымсыц, алхратә зин змоу, алхрақәа рҟынӡа 5 шықәса рыҩныҵҟа иааиԥмырҟьаӡакәа Аԥсны инхоз Аԥсны Аҳәынҭқарра атәылауаҩ.
Аҳәынҭқарра Ахада 5 шықәса ҳәа азинмч ҿҳәара иманы далххоит.
Аҳәынҭқарра Ахада иалхраан аамҭак ала далххоит Аҳәынҭқарра Ахада Ихаҭыԥуаҩ. Уи Аҳәынҭқарра Ахадас иқәгылоу дицқәгылоит. Аҳәынҭқарра Ахада Ихаҭыԥуаҩыс далхзар ҟалоит 35 шықәса ирхысхьоу, 65 шықәса ирҭымсыц, алхратә зин змоу, алхрақәа рҟынӡа 5шықәса рыҩныҵҟа иааиԥмырҟьаӡакәа Аԥсны инхоз Аԥсны Аҳәынҭқарра атәылауаҩ.