Аԥыза-министр актәи ихаҭыԥуаҩ инапынҵақәа назыгӡо, аенергетикеи атранспорти рминистр Џьансыхә Нанба Аҳәынҭқарра Ахада инапынҵақәа назыгӡо Бадра Гәынба Урыстәылантәи иаауа афымцамч абҵара 29 рҟынӡа ахә ахшәаауп ҳәа адырра ииҭеит.
Аԥыза-министр ихаҭыԥуаҩ, афинансқәа рминистр инапынҵақәа назыгӡо Владимир Делба ишиҳәаз ала, сынтәа иааидкыланы Аԥсны аенергетика аусхк амаҵзуразы 560 миллион мааҭ азоужьуп. Иара иажәақәа рыла, урҭ рахьынтә ареспубликатә биуџьет аҟынтәи 360 миллион мааҭ азоужьуп, 200 миллион мааҭ – Урыстәылатәи афинанстә цхыраара аҟынтәи.
«Арҭ аԥарақәа рҟынтәи 285 миллион мааҭ акоммерциатә фымцамч аахәаразы ишьҭуп ҳәа иҳәеит Владимир Делба.
«2024 шықәсазы Урыстәылантәи афымцамч асоциалтә аашьҭра 302 миллион кВт-сааҭ инаӡоит. 2025 шықәсазы иазԥхьагәаҭоу афымцамч аиура амҽхак 326 миллион кВт-сааҭ ҳәа иазгәаҭоуп. Урыстәылатәи аилахәыра «ИнтерРАО» заҵәык ауп аҳәаанырцәҟа афымцамч ашьҭра зылшо. 2023 шықәсазы «Амшынеиқәафымцамчи» ари аилахәыреи афымцамч аиуразы аиқәшаҳаҭра рыбжьарҵеит. Адокумент инақәыршәаны 2024 шықәсазы Аԥсны афымцамч кВт-сааҭ 4 мааҭк рҟынӡа аԥара ахнашәаауеит», – иҳәеит Аԥыза-министр ихаҭыԥуаҩ, афинансқәа рминистр Владимир Делба.
Аҳәынҭқарратә ҳазалхратә еилакы ахантәаҩы инапынҵақәа назыгӡо Оҭар Хьециа Аԥсны аҳазалхратә шәарақәа рплан 3% рыла инацны инагӡоуп ҳәа адырра ҟаиҵеит. Абри атәы иҳәеит Аԥсны Аҳазалхратә еилакы анапхгаҩы Оҭар Хьециа, Аԥыза-министр инапынҵақәа назыгӡо Валери Бганба имҩаԥигоз аилатәараҟны.
Хьециа иажәақәа рыла, аҳәаа иахыгоу амандарина быжьнызқь тоннак еиҳауп, ари ҵыԥхтәи арбагақәа раасҭа ҩ-нызқь тонна рыла еиҳауп.
Ашәахтәқәеи аизгақәеи рзы аминистр инапынҵақәа назыгӡо Михаил Габелиа иҟаиҵаз адырррақәа рыла, абҵарамза 20 рзы ашәахтә шәатәқәа раҳасабала атәыла абиуџьет иалагалахеит 5 млрд. 600 млн. мааҭ рҟынӡа аԥаратә малқәа, убри аан планла иазԥхьагәаҭан - 4 млрд. 986 млн. мааҭ.
Аԥсны агәабзиарахьчара аминистр инапынҵақәа назыгӡо Едуард Быҭәба Урыстәылатәи ахәышәтәырҭақәа рахь зышьҭра азԥхьагәаҭаз зегьы Урыстәыла ахәышәтәра иахысуеит ҳәа иазгәеиҭеит.
Уи иажәақәа рыла, аԥсуа ган аҟынтәи ауал ахьыҟаз инамаданы уадаҩрақәак ахьцәырҵқәаз ыҟоуп, аха урҭ рыӡбара алыршахеит.
Аԥсны асоциалтә еиқәыршәара аминистр Руслан Аџьба абҵарамзазы атәанчахәқәеи аԥаратә цхыраагӡатәқәеи ршәара аганахьала аиҵахара ҟамлаӡеит ҳәа адырра ҟаиҵеит.
Аҩныҵҟатәи аусқәа рминистр инапынҵақәа назыгӡо Роберт Киут аҩныҵҟатәи аусқәа Рминистрра аусбарҭақәа русура аганахьала аҭагылазаашьа ҭышәынтәалоуп ҳәа адырра ҟаиҵеит.
«Аҩныҵҟатәи аусқәа Рминистрра иазԥхьагәаҭоу аплан инақәыршәаны аус ауеит. Акызаҵәык уадаҩраны иҟоу абылтәы ахәԥса аганахьала ауал ауп. Уи азы аашьҭыҩцәа рҟынтәи ашәҟәы ҳауит. Егьирахь зегьы ҭышәынтәалоуп», – ҳәа иҳәеит Роберт Киут.
Арепатриациазы Аҳәынҭқарратә еилакы ахантәаҩы инапынҵақәа назыгӡо Вадим Ҳаразиа аҩныҵҟатәи аусқәа Рминистрра ахада арепатриант Али Кәыџба иқәмақарра иадҳәаланы иҟалаз аинцидент аилыргара шԥамҩаԥысуеи ҳәа дизҵааит.
Аҩныҵҟатәи аусқәа рминистр инапынҵақәа назыгӡо Роберт Киут иарбоу аинцидент аилыргаразы, Али Кәыџба иқәмақаруаз ауаа рышьақәыргылареи раанкылареи рзы иахәҭоу аоператив-ԥшааратә усмҩаԥгатәқәа зегьы мҩаԥыргоит ҳәа аҭак ҟаиҵеит.
«Аҭагылазаашьа азхьаԥшрада иаанымхаӡеит, ҳара иҳалшо зегьы ҟаҳҵоит иарбоу аҭагылазаашьа ирласны аӡбаразы»,–ҳәа иҳәеит иара.
