Аԥыза-министр ихаҭыԥуаа напхгара зырҭо ахырхарҭақәа рыла аусура шцо азы адырра ҟарҵеит. Аилатәараҿы иахьа еиҳа актуалра злоу, Урыстәылантәи акоммерциатә шьаҭала иаауа афымцамч азы ашәатәқәа ианаамҭоу рымҩаԥгара азҵаара иалацәажәеит ҳәа адырра ҟанаҵоит Аҳәынҭқарра Ахада ипресс-маҵзура.
Уажәазы иаауа афымцамч азы ашәатәқәа ахәаша, абҵарамза 22 рҟынӡа ишәоуп. Џьвартәи аӡеизакырҭаҿы иҟоу аӡы аҩаӡара алаҟәра инамаданы Егрытәи аӡфымцатә станциаҿы афымцамч аиура амҽхак амаҷхара иахҟьаны ишьақәгылаз адефицит харҭәаахоит Урыстәылантәи акоммерциатә шьаҭала иаашьҭхо афымцамч ала.
Бадра Гәынба ҳтәыла ауааԥсыра фымцалашарада иаанымхарц азы анаҩстәи афымцамч ахәԥса ашәара иазку аԥаратә малқәа реиқәыршәара иадҳәалоу аусура арӷәӷәаразы анапынҵақәа риҭеит.
* * *
Ахада инапынҵақәа назыгӡо Бадра Гәынба Аԥсны ақалақьқәеи араионқәеи рхадацәа алархәны аилацәажәара мҩаԥигеит.
Аилацәажаәара далахәын Ахада Иусбарҭа анапхгаҩы Абесалом Кәарҷиа.
Аҳәынҭқарра Ахада инапынҵақәа назыгӡо ақалақьқәеи араионқәеи рхадацәа рнапы ианиҵеит аҭыԥантәи ахаланапхгара аусбарҭақәа еиԥҟьарада русура алыршареи аиқәыршәареи реиҿкаара.
Бадра Гәынба анапхгаҩцәа ирыдиҵеит имариам аҭагылазаашьаан иҟалар зылшо апровокациақәа аҽрыламгалара, ҷыдала ҳтәылауаа ргәы иҵхо азҵаарақәа рыӡбара хшыҩзышьҭра арҭаларц.
Ақалақьқәеи араионқәеи рхадацәа лымкаала иазхьарԥшны иалацәажәан афымцамч ахәԥса алхразы аусура арӷәӷәара шаҭаху атәы.
