Адокумент излаҳәо ала:
1.Аԥсны Аҳәынҭқарра Ахада Аслан Бжьаниа ԥхьатәара дышцо ала арзаҳал алаиҵоит.
2.Аиҳабыратә хыбрақәа рыкәша-мыкәша рыҩнуҵҟеи еизаз еимпуеит 2024 шықәса ноиабр 19 азы. Абри нагӡамхар, Аԥсны Аҳәынҭқарра Ахада Бжьаниа А.Г. иԥхьатәаразы иарзаҳал шьҭахьҟа ирхынҳәуеит.
3.Аԥсны Аҳәынҭқарра Жәлар Реизара 2024 шықәса 19 азы иахәаԥшуеит Аԥсны Аҳәынҭқарра Ахада Бжьаниа А.Г. иԥхьатәаразы иарзаҳал.
4.Аԥсны Аҳәынҭқарра Ахада инапынҵақәа наигӡалоит Аԥсны Аҳәынҭқарра Ахада Ихаҭыԥуаҩ Гәынба Б.З.
5.Аԥсны Аҳәынҭқарра Ахада инапынҵақәа назыгӡауа Гәынба Б.З., иалаиҵо арзаҳал инақәыршәаны Аԥсны Аҳәынҭқарра Аԥыза-министр имаҵура аҟнытә ихы дақәиҭитәуеит Анқәаб А.З., аамҭакала абри амаҵура дахаиргылоит Бганба В.Р.
Аус зуа аминистрцәа рнапынҵақәа нарыгӡалоит ҿыц иалырхуа Аԥсны Аҳәынҭқарра ахада имаҵура дахагылаанӡа.
Аиқәшаҳаҭра рнапы аҵарҩит: Аԥсны Аҳәынҭқарра Ахада Ихаҭыԥуаҩ Бадра Гәынба, Аԥсны Жәлар Реизара Аиҳабы Лаша Ашәба, Аԥсны Аҳәынҭқарратә ҳазалхратә еилакы ахантәаҩы Оҭар Хьециа, Ареспубликатә уаажәларратә еиҿкаара «Аԥсны жәлар рхеидкыла» ахантәаҩы Адгәыр Арӡынба, Жәлар Реизара адепутат Кан Кәарҷиа, Аԥсны асуверенитет ахьчаразы аилак ахантәаҩы Леуан Миқаа.
Аԥсны Жәлар Реизара
Аиҳабы Л.Н.Ашәба иахь
Ҳаҭыр зқәу Лаша Нугзар-иԥа!
Атәылаҿы аҭышәынтәалареи аконституциатә леишәеи реиқәырхаразы, Аԥсны Аҳәынҭқарра Аконституциа ахәҭаҷ 65 инақәыршәаны, Аԥсны Аҳәынҭқарра Ахада имаҵура аҟнытә ԥхьатәара сцоит.
Ахада А.Г.Бжьаниа
Аҟәа ақ.
2024 ш. ноиабр 19
№1801
