ООН, ОБСЕ, ЕС рыцхантәаҩрала имҩаԥысыз аилацәажәарақәа рхы аладырхәит Аԥсны, Аахыҵ- Уаԥстәыла, Қырҭтәыла, Урыстәыла, Еиду Америка Аштатқәа. Абри азы адырра ҟанаҵоит Аԥсны адәныҟатәи аусқәа Рминистрра апресс-маҵзура.
Аԥсны аганахьала аиԥылара иалахәын: Аԥсны адәныҟатәи аусқәа рминистр ихаҭыԥуаҩ Одиссеи Бигәаа, Женеватәи аиҿцәажәарақәа рлахәылацәа, Аԥсны адәныҟатәи аусқәа Рминистрра ахаҭарнакцәа Лаша Аҩӡба, Артур Гагәылиа.
Женеватәи аиҿцәажәарақәа 62-тәи рраунд аҿы ҩ-гәыԥкны аилацәажәарақәа мҩаԥысуан — ашәарҭадареи агуманитартә зҵаарақәеи рзы.
Аиԥылараҿы уи алахәылацәа иазԥхьагәаҭаз амшхәаԥшә азҵаарақәа зегьы ирзааҭгылеит. Еиуеиԥышм атемақәа шьҭыхын. Ахәҭакахьала, актәи агәыԥ аҿы иалацәажәон аҳәаа иаԥну араионқәа рҿы аҭагылазаашьа. Аахыҵ-Кавказ ашәарҭадареи аҭышәынтәалареи рзы Женеватәи аиҿцәажәарақәа 62-тәи рраунд аҟны иалацәажәан иара убас амч ахамырхәаразы аицеиқәшаҳаҭра аус адулара азҵаара.
Аԥсны ахаҭарнакцәа ақырҭуа ган иадыргалеит ҿырҳәалатәи аицҳәамҭа авариант ҿыц, аха ақырҭуа ган аҽазныкгьы мап ацәнакит.
Аԥсни Қырҭтәылеи, Аахыҵ- Уаԥстәылеи Қырҭтәылеи рҳәааҟны аҭагылазаашьа аилатәара алахәылацәа зегьы, ақырҭуа ган ада, иҭышәынтәалоуп ҳәа ахәшьара арҭеит.
Убри аан аиԥылара алахәылацәа зегьы еицҿакны иазгәарҭеит ԥхьаҟазы ашьаҿақәа реицеихгара ада ԥсыхәа шыҟам. Аԥсны, Аахыҵ-Уаԥстәыла, Урыстәыла еиҭахгьы инаҵшьны ирҳәеит Қырҭтәыла амч ахамырхәаразы аиқәшаҳаҭра анапаҵаҩреи Гал ахҭысқәа рызхьаԥшреи раԥырҟәҟәаареи рзы амеханизм (МПРИ) арҿыцреи шаҭаху. Аганқәа ргәаанагарақәа еибырҳәеит.
Урыстәыла, Аԥсны, Аахыҵ- Уаԥстәыла рделегациақәа ацхантәаҩцәа рахь аиҿцәажәарақәа даҽа тәылак ахь риагара иадгылоит ҳәа аҳәамҭа ҟарҵеит. Уи мзызс иаиуит Швеицариа анеитралтә позициа аанкылара иахьаҟәыҵыз.
Швеицариа аганахь агәынамӡара аадырԥшуеит Аԥсынгьы, Аахыҵ-Уаԥстәылагьы. Уи зыдҳәалоу авизатә политика ахьдыруадаҩыз ауп. Аԥсни, Урыстәылеи, Аахыҵ-Уаԥстәылеи Беларусҟа, ма Сербиаҟа риагаразы авариантқәа ирыхәаԥшуеит.
Аиҿцәажәарақәа аҩбатәи ртемас иҟан Аԥсни Аахыҵ-Уаԥстәылеи ртәылауаа ԥынгыла рымамкәа инеиааиларц азы, аҵареи агәабзиарахьчареи уадаҩрада ироуларц азы азҵаарақәа. Аҟәа ажәалагала ҟанаҵеит аԥсуа тәылауаҩшәҟәы змоу атәылауаа егьырҭ аҳәынҭқаррақәа рахь ицаразы ироуа ауадаҩрақәа рыӡбаразы жәларбжьаратәи аусуратә гәыԥ аԥҵазарц.
Жәларбжьаратә аиҿцәажәарақәа анаҩстәи 63-тәи рраунд азԥхьагәаҭоуп 2025 шықәса хәажәкырамза актәи азбжазы.
