Асааҭ 11:20 Аилатәара 35-ҩык адепутатцәа рҟынтәи 21-ҩык роуп зхы алазырхәыз. Жәлар Реизара  Аиҳабы Лаша Ашәба амшхәаԥштә алацәажәаразы ажәалагала ҟаиҵеит. Уи «адепутатцәа џьоукы иарбоу абри аҩыза аҭагылазаашьаҿы аусура мап ацәыркуеит» ҳәа иазгәеиҭеит. Апарламент Аиҳабы атәылауаа агәҭынчра аадырԥшырц, апровокациақәа рыҽрыларымгаларц, ҳаҭыреиқәҵарала еизныҟәаларц, ачҳареи ахарахәыцреи рымазарц азы ааԥхьара ҟаиҵеит.  

 11:25 Аиҳабыратә хыбрақәа ркомплекс ахь узланеиуа амҩақәа зегьы ирԥырагылоуп арратә машьынақәеи автобусқәеи. Ашәарҭадара ауснагӡатәқәа рӷәӷәоуп.

11:30 – Жәлар Реизара ахыбра аҿаԥхьа аоппозициа ахаҭарнакцәа аизара иалагеит, урҭ аиқәшаҳаҭра аратификациазы азакәан апроект шьҭахьҟа архынҳәразы адҵа ықәдыргылеит.  

 11:35 – Адепутатцәа  аилатәара амшхәаԥтә мап шацәыркуазы рыбжьы рҭиит.

 11:40 – Жәлар Реизара ахыбра аҿаԥхьа апротесттә акциа шцац ицоит.   Акциа алахәылацәа асессиа амҩаԥгара арыцхә аиагаразы агәынамӡара аадырԥшуеит, адҵагьы ықәдыргылоит  адепутатцәа абжьыҭира мҩаԥыргарц, Аинвестициатә усуразы Аԥсны-Урыстәылеи реиқәшаҳаҭра аратификациа мап ацәыркырц.

12:20  – Апротесттә акциа иалахәыз рҟынтәи ԥыҭҩык  автомашьына «Урал» ала аихаанда аԥҽра рҽазыршәеит.

 12:30  – амчратә структура  аусбарҭақәа русзуҩцәеи апротесттә акциа иалахәуи рыбжьара   ана-ара аидысларақәа ҟало иалагеит.

 13:28   – Аҳәынҭқарратә хьчара Амаҵзура аиҳабы Дмитри Дбар апротест ҟазҵо рахь дцәырҵит.   Иара урҭ иқәдыргыло адҵақәа Аҳәынҭқарра Ахада иҟынӡа ишнеиго азы ажәа риҭеит.

 12:35   – Апротест мҩаԥызго ауаа  атәылахьчара Аминистрра амашьына «Урал» ахархәарала Жәлар Реизара аҿаԥхьа аихаанда ахәҭак дырбгеит.

  13:35 – апротест мҩаԥызго ауаа рахь инеит   аҩныҵҟатәи аусқәа рминистр Роберт Киути Аҳәынҭқарратә Шәарҭадара Амаҵзура ахантәаҩы Дмитри Кәычбериеи. Урҭгьы убасҵәҟьа дара иқәдыргыло адҵақәа Аҳәынҭқарра Ахада иҟынӡа ишнарго  азы ажәа рырҭеит.

 14:20 – Аԥсны ауаҩы изинқәа рыхьчаразы  Азинмчы змоу Анас Кьышьмариа Жәлар Реизара-Апарламент адепутатцәа рахь, ауаажәларррҿы иҟоу аиҿагылареи, аҭагылазаашьа аибарххареи инарымаданы атәылаҿы аилаҩынтрақәа хацзыркуа азҵаарақәа  рыхәаԥшра, ааигәа имҩаԥысраны иҟоу   Аԥсны Ахада иалхрақәа рҟынӡа анаскьагара   алдыршарц азы ааԥхьара ҟалҵеит.  Уи иара убри аамҭазы азинхьчаратә усбарҭақәа рахьгьы азин еилазгаз рганахьала амч ахархәара азԥхьагәазҭо азакәанқәеи ауснагӡатәқәеи реизышәазаара апринципқәеи  рықәныҟәара ахымԥадатәразы ааԥхьара ҟалҵеит. Аомбудсмен иара убас аоппозициа аԥызацәеи апротестә акциа алахәылацәеи  рахьгьы азакәан аҳәаақәа ирҭагӡаны ахымҩаԥгареи амч  ахархәара мап ацәкреи рзы аҳәара ҟалҵеит.

 14:25 рзы – Ааҩык Ареспубликатә хәышәтәырҭахь инаган ҳәа Аԥсныпресс ахь адырра ҟарҵеит атәыла агәабзиарахьчара Аминистрраҿы.  Амедицинатә цхыраара зҭахыз зегьы иахәҭоу ацхыраара рыҭан. Аӡәы ахәышәтәырҭаҿы даанхеит, аҳақьымцәа ихылаԥшуеит, егьырҭ амбулатортә хәышәтәрахьы ииагоуп.

 14:55 – Аҳәынҭқарра Ахада Аслан Бжьаниа Аҟәа ақалақь аҿы дыҟоуп. Уажәы Аҳәынҭқарра Ахада ареспубликаҿы аҭагылазаашьа аҭышәынтәаларазы ауснагӡатәқәа мҩаԥигоит, ҳәа адырра ҟанаҵоит Аҳәынҭқарра Ахада ипресс-маҵзура.

15:05 – Уажәы  Аҳәынҭқарра Ахада Иусбарҭа «Урыстәылатәи Афедерациа Анапхгареи Аԥсны Аҳәынҭқарра Анапхгареи рыбжьара Урыстәылатәи аиуристтә хаҿқәа рыла Ареспублика Аԥсны иахьаҵанакуа аинвестициатә проектқәа рынагӡара азы Аиқәшаҳаҭра аратификациа азы» азакәан апроект Жәлар Реизара-Апарламент аҟынтәи архынҳәра азы аусшәҟәы аиқәыршәара иаҿуп, ҳәа адырра ҟанаҵоит Аҳәынҭқарра Ахада ипресс-маҵзура. Ас еиԥш аӡбамҭа ареспублика аҿы аҭагылазаашьа аҭышәынтәалара хықәкыс иҟаҵаны ирыдыркылеит. Уи аамҭазы апротест мҩаԥызго ауаа аиҿцәажәарақәа иахьрыдхалацәаз азы агәынамӡара аадырԥшуеит, азынџьырқәа рыла аԥенџьырқәа ирҭагылаз аихыршьқәа ыҵыржәеит. Урҭ анапхгаратә хыбрақәа ааныркылеит, Аҳәынҭқарра Ахада ԥхьатәара дцеит ҳәа адырра роуаанӡа араантәи ишымцо азы аҳәамҭагьы ҟарҵеит.   

 15:10 – Апротест мҩаԥызго ауаа Жәлар Реизара аԥенџьырқәа ҩба ирҭагылаз аихыршьқәа ыҵжәааны, ахыбра аҩныҵҟа иҩналеит.

15:15  – Аоппозициа ахаҭарнакцәа Аҳәынҭқарра Ахада ԥхьатәара ишьҭра азы адҵа ықәдыргылоит.

15:40  – Аԥсны Жәлар Реизара ахыбреи Аҳәынҭқарра Ахада Иусбарҭа ахыбреи апротесттә акциа мҩаԥызго ауаа иааныркылеит.

    16:10 –  Аоппозициа аԥхьагылаҩцәа рхаҭарнак Леуан Миқаа Аҳәынҭқарра Ахада Иусбарҭа аконференц-зал аҿы араҟа еизаз ауаа Аҳәынҭқарра Ахада ԥхьатәара ишьҭразы аӡбамҭа шрыдыркылаз азы адырра роуаанӡа џьаргьы ишымцо азы аҳәамҭа ҟаиҵеит.

17:20 – Жәлар Реизара адепутатцәа гәыԥҩык Аҳәынҭқарра Ахада иацәажәаразы идәықәлеит.