Аспектакль аҿы ихадоу арольқәа нарыгӡон Аркади Кирсанов ироль наигӡон Руслан Жьиба, Евгении Базаров ироль  – Емиль Петров.  Арежиссиор хада –Б.Шьчукин ихьӡ зху атеатртә институт аушьҭымҭа Егор Равинскии. Иара аспектакльқәа рацәаны иқәиргылоит Москва, ара Аԥсны раԥхьаӡа акәны иқәиргылеит. Ақәыргылара иаҭахыз ахарџьқәа ракәзар, Урыстәыла акультура Аминистрра иашәеит. Асахьаҭыхҩы-ақәыргылаҩ Евгени Терехов, ашәҵатәы аԥҵаҩы Анастасиа Терехова, акомпозитор Алексеи Асеев. Аспектакль лашарала еиқәиршәеит Денис Солнцев, бжьыла – Алексеи Осиев.

Аспектакль атема хада уԥылоит аԥсҭазаараҿы, аиҳабацәеи абиԥара ҿеи реиҿагылара. Еснагь ари атема актуалтәуп, уи иаанагом абиԥара ҿа, мамзаргьы аиҳабцәа иашаӡам ҳәа, аха ахәыҷқәа рабацәа ианырҿагыло рацәоуп, убри аан иҳазҳәом абацәагьы ирҿагылатәуп ҳәа, ажәакала зегьы дара рхатәы иаша рымоуп, аҳәарагьы  иақәиҭуп. Абраҟа ихадоу – ауаҩытәыҩса  насыԥ иманы иҟазаара ауп. Убри азыҳәан аӡәы иҽааникылароуп.

Анна Одинцова  лроль  налыгӡон актриса Ирина Делба. Ихадоу ахҭысқәа  ахьымҩаԥысуа андуи абдуи руада есааира аилаҳара иаҿуп, дара ртәала иацхраауеит, идырҽеилоит, аха  илҵшәадоуп. Ахәыҷқәа  ракәзар рабацәа  уи нараҽԥныркылоит, рынхашьа-рынҵышьа раҭәаршьом. Аспектакль  «Отцы и дети» ахәаԥшцәа ирыдыркылеит еиуеиԥшымкәа. Иҟоуп уи зхәыҷра ашҟа иархынҳәыз, иҟоуп ишьҭрақәланы И.Тургенгев ироман аҽазнык ианарԥхьаз. Арольқәа назыгӡоз рҟазара  дазааҭгыло,  ахәаԥшҩы И.Ҳагба иазгәалҭоит: Емиль Петров ихәмаррала акыр  дизааигәан ифырхаҵа Базаров, иара убасҵәҟьа дақәшәаны ироль наигӡеит Леон Ӷәынџьиа (Ситников)».

Аспектакль иахәаԥшуаз зегьы агәалаҟазаара бзиа рзыннажьит, иубаратәы иҟоуп актиорцәа даараӡа рхы аус  шадырулаз, аиашазы ари  ақәыргыламҭа мызкы иназынаԥшуа рҽазыҟарҵон.

Аԥхьаҟа ирзыԥшуп иҵегьы аԥҵамҭақәа, ирзеиӷьаҳшьоит ақәҿиара дуқәа.

Наира Сабекиа