Уи еиҿыркааит Аԥсны аҵара Аминистрреи Аҿартә-хәыҷтәы центр «Артеки» рнапхгарала. Уи мҩаԥысуан ҩымш ирылагӡаны. Ацәыргақәҵа аҳәаақәа ирҭагӡаны иаԥшьган арҿиаратә конкурсқәеи аҟазара-классқәеи, иара убас арҵагатә программақәеи.
Ацәыргақәҵа аартуа аҵара аминистр Инал Габлиа иҳәеит 2025 шықәса ииун мзазы ҳара ҳхәыҷқәа шалахәхо «Артек» 100 шықәса ахыҵра ахьазгәарҭо. Уи азы ааԥхьара ааишьҭит Урыстәыла аҵара аминистр Сергеи Кравцов.
Убри аганахьала Аԥсны раԥ­хьаӡатәиуп ааԥхьара зауз, уантәи арҵаҩцәа, анапхгаҩцәа рҭаалоит еиуеиԥшым атәылақәа ирықәшәалоит ашколхәыҷқәеи астудентцәеи аибадырразы. Атәыла Ахада Иусбарҭа аиҳабы Абесалом Кәарҷиа дазааҭгылеит «Артек» имаҷымкәа абиԥарақәа шеиҵанааӡахьоу, агәалашәара ссирқәагьы шҳамоу. «Сара исгәалашәоит, ари алагерахь ацара ус ишымариамыз. Аиашазы, сара схәыҷра сазшәырхынҳәит ари еиҿызкааз», – иҳәеит иара.
Жәларбжьаратәи ахәыҷтәы центр «Артек» аиҳабы Константин Федоренко Инал Габлиа иҭабуп ҳәа иаҳәауа, иазгәеиҭеит дара Аԥснытәи ахәыҷқәа уахь рнаԥхьара адагьы анапхгаҩцәеи ахәыҷтәы лагерқәа рааӡаҩцәеи разыҟаҵаразы алшарақәа рзаԥырҵарц шрылшо. «Урыстәыла «Артек» аиқәырхараз иалшаз џьашьатәуп. Иаагозар, 2015 шықәсазы иара иаднакылар алшон 5- нызқьҩык ахәыҷқәа, иахьатәила – уи алшарақәа наӡеит 43- нызқьҩык рҟынӡа, ари иҵегьы еизҳалоит. Сынтәа 76 тәыла рҟнытә ахәыҷқәа ҳаман, убри ахыԥхьаӡараҿ иҟан Аԥснытәи ашколхәыҷқәагьы. Сгәы иаанагоит, «Артек» Аԥсны аара аҵак ду амоуп ҳәа», – иҳәеит Константин Федоренко.
Ацәыргақәҵа иалахәыз ашколхәыҷқәа ирԥон ахәдахаҵақәа, аиувелиртә рԥшӡагақәа, насгьы аматриошкақәа анапы зҵаҩыз, ҳамҭас рықәлацәа иргаратәы. Аиашазы, асеиԥш иҟоу ацәыргақәҵақәа ахәыҷқәа реибадырра, реигәныҩра иацхраауеит, насгьы ажәларқәа рнеизыҟазаашьа арӷәӷәоит, уи ахәыҷқәа рнаҩсангьы адуцәагьы рзын ихҭыс бзиоуп.

Наира Сабекиа