Ари ақәгылара аԥхьа ҽнак, уаҟа имҩаԥысит Хьыбла Леуарса-иԥҳа лнапхгарала уаанӡа имҩаԥгаз авокалистцәеи аконцертмеистрцәеи реиндаҭлара иалауреатцәахаз Ливеи Хоуи Жаргал Цырендагбаеви рконцерт. Адырҩаҽны, урҭ аҩыџьегьы Хьыбла илыцқәгылеит. Ароиаль аҟны дыхәмаруан жәлар рартистка иналыгӡо лашәақәа рмелодиа хаақәа еснагь ҟазара ҳаракыла иазырҳәо, еицырдыруа Екатерина Ганелина.
Афестиваль алахәцәа, иара убас, анаҩстәи амшқәа рзы ақәгыларақәа мҩаԥыргеит миллионҩыла ауаа зланхо, ҳәынҭқаррак иаҟароу ақалақьқәа Пекини Шанхаии рҟынгьы.
Хьыбла Гьерзмаа лырҿиаратә ԥсҭазаараҿы еиԥш, аԥсуа милаҭтә доуҳа аӡыргараҿгьы акырӡа зҵазкуа хҭысуп, Китаи ауаажәларра рҿаԥхьа раԥхьаӡа акәны уи лықәгылара.

А.Бзыԥба