Лыхнашҭа аныҳәа иаанарԥшуеит аԥсуа ихаҿра, ажәлар рынхашьа, рынҵышьа, рҟазшьа, раԥхьаӡа иргыланы рысасдкылашьа, рнапҟазара, рбаҩхатәра... Ас еиԥш иҟоу аныҳәа раԥхьаӡакәны Лыхнашҭа имҩаԥган 1984 шықәсазы. Сынтәа 40 шықәса ҵит жәлар рныҳәа атрадициа иқәныҟәоижьҭеи.
Абҵарамза 3 рзы Лыхнашҭа имҩаԥысит аиубилеитә ныҳәа- аҽаҩраныҳәа. Уи иалахәын Гәдоуҭа араион аҟынтә 22 қыҭа. Иара убас Афон ҿыц ақалақьи, Ҟарачы-Черқьессиантәи иааз асасцәеи.
Лыхнашҭа имҩаԥгаз аҽаҩраныҳәа даҭааит Аԥсны Ахада Аслан Бжьаниа, иара убасгьы Аԥсны Жәлар Реизара аиҳабы Лаша Ашәба, адепутатцәа, аиҳабыра рхаҭарнакцәа, аҳәынҭқарратә усбарҭақәа рхадацәа, Гәдоуҭа араион ахадара.
Аԥсны Ахада Аслан Бжьаниа аныҳәа иалахәыз зегьы ирзеиӷьишьеит аҭынчра, аизҳара.
Ари аныҳәаҟны қыҭацыԥхьаӡа ирызгылан быцла ишшны иҟаз ахыбрақәа. Урҭ рхиан еиуеиԥшым ашәырхкқәеи, ауҭраҭыхқәеи рыла. Иара убасгьы уаҟа ицәырган досу иқыҭа аҭоурых зныԥшуа амыругақәа, иаҳҳәозар: аԥсуа ихаҿра зныԥшуа анаплыхқәа, ижәытәӡоу аԥсуа инструментқәа, аҭоурых азырԥшуа афотосахьақәа уҳәа акыр.
Анхацәа ицәырыргеит раарыхра–амилаҭтә чыс: аҩы, ауаҭка, ауҭраҭых, ашәыр.
Аныҳәаҟны иқәгылеит акәашаҩцәеи аԥсуа естрадатә ашәаҳәаҩцәеи. Иара убасгьы уаҟа имҩаԥысит, ахыци ахәымпали рыла ахысра, аимҵакьачара уҳәа амилаҭтә спорттә еицлабрақәа. Аимҵакьачараҿы Ҷлоуааи Афонааи реиндаҭлараҿы Ҷлоуаа аԥыжәара ргеит.
Аҽаҩраныҳәа аҿы сынтәа раԥхьаӡакәны ақыҭашҭақәа рырхиашьеи рцәыргақәҵақәа реиҿкаашьеи, рысасдкылареи рзы аицлабра рылаҳәан араион Ахадара рҟнытә. Иалкаахаз актәи аҭыԥ азы - 50 нызықь мааҭ; аҩбатәи аҭыԥ - 30 нызқь мааҭ; ахԥатәи аҭыԥ - 20 нызықь мааҭ рзыԥҵәан.
Абасала Лыхнашҭа иқәыҩуаз агәырӷьабжьы ажәлар еиднакылон, урҭ рлафи ражәеи акыраамҭа ашҭа иҭыҩуан!
Саида Ҳаразиа
