Нхыҵ-Уаԥстәылатәи атеатр актәи амшазы иқәдыргылеит Уилиам Шекспир итрагедиа «Король Лир». Ақәыргылаҩ Гиви Валиев. Ари аспектакль аҿы ихадароу темоуп, имажәӡо атема – аби ахшареи реизыҟазаашьа. Аб имазара имаз зегьы ихшара ишырзеихишазгьы дыржьеит, аиаша ахьыҟоу изыԥшаауам. Актиорцәа рыхәмарраҿ, рцәажәараҿ ианыԥшуеит ауаԥс жәлар ртемперамент, рыҩнуҵҟатәи рдунеи ҭбаа. Убри азакәхап ари аспектакль аҿы ароль хада назыгӡоз Нхыҵ-Уаԥстәылатәи жәлар рартист Алан Албеков «Золотая маска» зианашьахазгьы.
Ҟазарыла зрольқәа назыгӡоз актиорцәа ахәаԥшҩы дхырхуан «Король лир» иԥҳацәа: Гонерилиа – Фатима Хасанова, Регана – Мадина Хинчагова, Вероника Цугкиева.
Иҟам ароль хәыҷы, ароль ду. Даара ҟазарала лроль налыгӡеит ақьачқьҩы – Амина Агнацева, уи баша лафҳәаҩымызт, дыччо-дыхәмаруа, ҟәыӷарыла аҵабыргхаҭа аалырԥшуан.
Аспектакль «Король Лир» иалыркаахьеит ԥшь-номинациак рыла «Ахьтәы маска», «Иреиӷьу аԥҳәыс лроль», «Иреиӷьу ахаҵа ироль», «Иреиӷьу аспектакль», «Иреиӷьу арежиссиор».
Аҩбатәи амшазы Ауаԥс театр Аԥсны рықәгыларақәа хдыркәшеит аспектакль «Овод» ақәыргыларала.
Ҷыдала, Етель Лилиан Воинич лроман аԥсышәала еиҭаганы хазы шәҟәны иҭрыжьхьеит. Иџьашьатәым аспектакль «Овод» ахәаԥшраз иааиз ҳтеатр ду ахьыҩндырҭәаауаз.
Аспектакль аҿы зегь реиҳа далукаауеит афырхаҵа Артур Бертон, уи илахьынҵа уагәыланахалоит, ҵҩа рымаӡам иара игәаҟҵәаҟрақәа, уи иԥсҭазаараҿ иԥылоит ачарҳәарагьы, аилибамкаарагьы еиҳа бзиа иибо, дзықәгәыӷуа ауаа рҿынтәгьы.
Аспектакль ықәиргылеит иқәыԥшу, аха еицырдыруа арежиссиор Ельдар Трамов. Ароль хада – Феличе Риварес ироль дыхәмарит Аахыҵ-Уаԥстәылеи, Ҟабарда-Балкариеи рҟны зҽаԥсазтәыз артист Гиви Валиев.
Ари аспектакль убри аҟынӡа қәҿиарала иқәыргылан акраамҭа ахәаԥшцәа рнапеинҟьабжьқәа еихсыӷьуамызт.
Зегьы рзы игәахәара дууп ҳаешьаратә жәларқәеи ҳаԥсуа театри ркультуратә еиҿцаарақәа, реигәныҩра. Аҵыхәтәан асценахь ихалеит ҳактиорцәа хатәрақәа, Софа Агәмаа, актиорцәа ҿарацәа, урҭ ашәҭ шьыҵәрақәеи азеиӷьашьарақәеи рыла ихдыркәшеит ҳашьцәа рықәгылара.
Хәҭакахьала ҳасасцәа, Ауаԥс театр актиорцәа ирҳәеит даргьы Аԥсуа драматә театр агастрольқәа ишырзыԥшу.
Наира Сабекиа
