Очамчыра араион анапхгара рыбзоурала Ҭхьына ақыҭан аиҭашьақәыргылара нап аркын ақыҭа анапхгара зыҩноу ахыбра. Ари ахыбра ргылан 50-60-тәи ашықәсқәа рзы.
Аибашьра ҟалаанӡа ахыбра актәи аихагылаҿы иҟан адәқьан, аклуб, абиблиотека. Аҩбатәи аихагылаҿы аус руан ақыҭа анапхгара, аҳасабеилыргаҩцәа, аекономистцәа, акассирцәа уҳәа аӡәырҩы. Иахьазы актәи аихагылаҿы акагьы ыҟам. Аҩбатәи аихагылаҿы уаанӡа еиԥш ақыҭа анапхгара тәоуп. Иара убас уаҟа луада ыҟоуп ақыҭараҿы амедицина амаҵ азызуа амедиаҳәшьа Џьулетта Кархалаа.
Ахыбра акәзар, архитектура даара иԥшӡоуп, ауаҩы илаԥш надхало иҟоуп. Еиҳараӡак уажәы, аиҭашьақәыргыларатә усурақәа анымҩаԥырга, ақыҭа агәаны илаша-лашо убла иаахгылоит.
Ҭхьына ақыҭан Анҷара аҳабла аҟны инхо ауааԥсыра аҳәынҭқарра анапхгара рахь иҟарҵаз аҳәарала Мықә аӡиас уаанӡа ихыз икнаҳау ацҳа аӡы иахьагаз аҟнытә, ҿыц ацҳа рзыхҵан. Иара убас ари аҳаблаҟны напы аркуп афымцамҩангага ацәаҳәақәеи ашьаҟақәеи реиҭарҿыцра.
Ҭхьына ақыҭа иалсуа Мықә аӡиас амшцәгьақәа раан ианхыҵуа аԥхасҭа ҟанаҵоит. Иҵнаӡәӡәаауеит ақыҭаҿ ихыу ацҳа ду ашьапы. Аԥсны анапхгара рҟынтәи аԥара азоужьын аӡы аԥхасҭа ҟанамҵартә еиԥш, иақәнагоу атехника наганы аӡыршьҭра ԥсахын, ацҳа ашьапы арӷәӷәаразы. Иахьазы урҭ аусурақәа хыркәшоуп.
Хәбаҟа шықәса раԥхьа Ҭхьына ақыҭан ҿыц иргылан ашкол, иблыз аҭыԥан. Ааигәа уи ашҭаҿы ахәыҷқәа рзы ампыласырҭа адәы маҷ ҟаҵан.