«Москва Аҩны» адиректор Алеқсандр Бигәаа Аԥсныпресс акоррепондент диҿцәажәо, атурнир атәы далацәажәеит. «Ари шьҭа ахԥатәи турнируп ҳкоманда аиҿкаарала имҩаԥысуа. Аԥхьа уи ахәыҷқәа рыхьчара Жәларбжьаратәи Амш азгәаҭара аҳәаақәа ирҭагӡаны имҩаԥысуан, аха сынтәа Москва ақалақь Амш азгәаҭара иазкхоит. Иалахәуп 45-ҩык ахәыҷқәа қәрала еихшаны. Атурнир мҩаԥысуеит ақәратә категориақәа ҩба ирыҵанакуа ахәыҷқәа рыбжьара: 8 – 10 шықәса зхыҵуеи 10 – 13 шықәса зхыҵуеи рыбжьара. Аҷкәынцәеи аӡӷабцәеи хазы-хазы еицлабуеит иҳәеит Алеқсандр Бигәаа. Абар шьҭа ҩы-шықәса инеиԥынкыланы атурнир аӡбаҩ хадас дыҟоуп – аԥышәа ду змоу, Ашлем Дуи Аолимпиадеи рҿы уахь иналаҵаны, Урыстәылатәи жәларбжьаратәи атурнир дуқәа рҿы ас зухьоу аспециалист. «Атурнир хымш имҩаԥыслоит. Аиааирагаҩцәеи аԥхьахәгаҩцәеи аҳамҭақәа – ахраҿақәеи амедалқәеи ранашьахоит», – иҳәеит Алеқсандр Бигәаа.
Атурнир ахықәкы хаданы иҟоуп – ахәыҷтәы спорт аҿиареи Аԥсны аԥқьаҭмпыласыҩцәа қәыԥшцәа адгылара рыҭареи. «Аԥсны аԥқьаҭмпыл иалаҵәоу спорт хкны иҟоуп, аха, рыцҳарас иҟалаз, ихыбу акортқәа ыҟаӡам. Ахьшәашәарақәа раан ахәыҷқәа иарбоу аспорт хкы иазкым азалқәа рҿы рҽазыҟарҵар акәхоит, уи аҽазыҟаҵарақәа рылҵшәеи аԥқьаҭмпыл асҩцәа ҿарацәа разыҟаҵара аҩаӡареи ланарҟәуеит. Ҳара иаҳҭахуп аҳәынҭқарреи аспонсорцәеи иарбоу апроблема радыԥхьалара, ахәыҷқәа алшықәсанык иарбоу аспорт хкы ала аҽазыҟаҵаразы алшара роурц», – иҳәеит Алеқсандр Бигәаа. Аицлабрақәа хыркәшахоит цәыббрамза 12 рзы. Аиҿкааҩ – Аҟәа иҟоу Москва Аҩны, адгылара ҟарҵеит — Москва Аиҳабыра, Москва адәныҟаекономикатәии жәларбжьаратәи аимадарақәа р-Департамент, аџьынџьуаа Москватәи Рыҩны.
