Ашкол – дарбанызаалак ауаҩы инысымҩаҿы ихадароу аамҭоуп. Абраҟоуп, ишдыру еиԥш, еиҵагыло абиԥарақәа иахьроуа адырра, аилкаара, иахьышьақәгыло руаҩратә хаҭара, ртәыла иаԥсоу ҵеицәаны иахьеизҳауа. Цәыббра 1 – акраҵанакуеит раԥхьаӡа ашкол ашәхымс ихыҵуа рзеиԥш, азҿлымҳара ҳаракы зцу ашколтәи, астуденттәи мҩақәа рахь адыррарҳара иазынархоу ашьаҿақәа ҟазҵо зегьы рзы.

Ҳтәылаҟны иахьазы аус руеит зынӡа 153 школ: аԥсуа школқәа – 58; аурыстәқәа – 55; аԥсуа-аурыстәқәа – 16; аерман – 24.

Урҭ рахьтә ақалақьтә школқәа – 40, ақыҭатәқәа – 113, ашкол-интернатқәа – 4. Урҭ зегь рахь сынтәа ршьаҿа еихыргоит зықьҩыла ҳаԥсадгьыл аԥеиԥш знапы иану ахьыбҿар. Дызусҭзаалакгьы аԥсҭазаараҿы ахааназы хашҭра изақәым адыррақәа рдунеи ахь раԥхьаӡа акәны ишьаҿа анеихигаз амш, дыҟам гәеизҳарыла изгәалазмыршәо раԥхьатәи аҵәҵәабжьы, раԥхьатәи арҵаҩы, ашколтә мамзаргьы астуденттә ҩызцәа. Мҩамш шәԥеиԥшзааит аҿар!