Иахьатәи аамҭазы аҧсуааи абазақәеи дгьылк аҿы еицнымхозаргьы, дара лассы-лассы еиҿыркаауеит еиҳагьы еизааигәазтәыша аиҧыларақәа, имҩаҧыргоит аусмҩаҧгатәқәа, русеицура еиздырҳауеит, ҧхьаҟатәи амҩа еицылырхуеит.
Ҧхынгәымза 21 инаркны 23-нӡа Черкесск ақалақь аҿы имҩаҧысуан акультура-спорттә афестиваль. Уи афестиваль сынтәа имҩаҧысуан «Аҧсуа» захьӡу аул аҿы. Уи еиҿыркааит аԥсуа-абаза жәлар рыҿиара иацхраауа жәларбжьаратәи ахеилак «Алашара», иара убаз Адунеизегьтәи аԥсуа-абаза конгресс. Аспорттә фестиваль раҧхьаӡа акәны имҩаҧган 2014 шықәсазы. Абаза жәлар рыхәмаррақәа раҧхьа ианеиҿкааз Ҟарачы-Черқьессиа ақыҭақәа рҟынтә акомандақәа ракәын иалахәыз, аха анаҩс уи амҽхак еиҳа иҭбаахеит, рхы аладырхәуа иалагеит Аҧсны, Москва, Ставрополь рҟынтәи акомандақәагьы.
Ҟарачы-Черқьесстәыла имҩаԥсуаз IX акультура-спорттә фестиваль «Абаза» рхы аладархәит 37-ҩык аԥсуа спортсменцәа. Абаза жәлар рыхәмаррақәа рартраан иқәгылеит ашықәс аҩныҵҟа имҩаԥысуаз еиуеиԥшым аиндаҭларақәа рҿы иалкаахахьаз аԥсуа-абаза спортсменцәа. Урҭ дреиуоуп БРИКС ахәмаррақәа рҟны аџьаз аԥхьахә иаԥсахаз Раҳман Напиџьев. Аспорттә фестиваль иҟаз аицлабрақәа иреиуоуп: аҩра, ашьапылампыл, анапылампыл, ашаха ахара, ахыц ала ахысра, ашьаҟа ахалара, ахаҳәырԥара уҳәа иҵегьы.
Арҭ аицлабрақәа азҿлымҳара ҵаула рыҵаны имҩаԥысуан.
Аҵыхәтәаны аицлабрақәа зегьы рзы аихшьаала ҟаҵо, актәи аҭыҧ ааныркылоит ақыҭа Ҟәбина акоманда, аҩбатәи – Инџьықь-Ҷкәын, ахҧатәи – Гәымлоқыҭ «Красный Восток». Анапылампыл асразы Аҧсны ӡырызгоз Аҟәатәи аӡӷабцәа ргәыԥ акәын. Дара Аԥсны имҩаԥысуаз ачемпионат аҟны аиааира анырга, алшара роуит Ҟарачы-Черқьесстәыла ахәмаррақәа рхы рылархәра. Аицлабраҟны ркоманда аҩбатәи аҭыҧ ааннакылеит. Араҟа иазгәаҭатәуп, иаҳхысыз ашықәсқәа раан анапылампыл асразы арҭ аицлабрақәа ирылахәыз Аԥснытәи аҭыԥҳацәа инеиԥынкыланы хәышықәса аиааира раԥызгоз дыҟамызт.
Аусмҩаԥгатә апрограмма анҭыҵ 2000 метра ахьыбжьаз англыз шьацқьа злоу аҽыжәлақәа рыбжьара имҩаԥысуаз аицлбраҿы Нодар Цәышба иҽы «Радеда» актәи аҭыԥ ааннакылеит.
9-тәи абаза хәмаррақәа анхыркәшаха зҽалызкааз иранашьан аҳаҭыртә шәҟәқәеи, аҳамҭақәеи, ахраҿақәеи. Иарбан усхкызаалакгьы иамоуп ахатәы ҷыдарақәа. Абаҩрҵәыра - агәабзиара иашьаҭоуп, еиҵахарак ҟамҵакәа ахықәкы хада ишазнеитәу иланааӡоит ауаҩы.
Аспорттә фестиваль хыркәшан еицырдыруа абазеи аԥсуа шәаҳәаҩцәеи злахәыз аконцерт ала.
Анаҩс ақалақь Черқьесск адгьыл иаҵәа ҳәа изышьҭоу ақалақьтә баҳча ԥшӡа аҟны ииуль 23 рзы имҩаҧысит абаза жәлар ркультура Амши Аҧсны Аҳәынҭқарра Абираҟ амши ирызкыз агәырӷьаратә усмҩаԥгатә. Уаҟа иубарҭан асахьаҭыхыҩцәа ҟазақәа рцәыргақәҵа, аҧсуа-абаза бираҟқәа, анапкымҭақәа, амилаҭтә фатәқәа, абаза жәлар рҭоурых иадҳәалоу ржәытә-рҿатә бзазара аазырԥшуа амыругақәа, абаза бызшәала исахьаркны ажәеинраала аԥхьаразы аицлабра, имҩаԥган еиҳа еиӷьу амилаҭтә маҭәа ныҟәызго ҳәа аицлабра, ауаҩы ибла иабаз рахьтә узызҿлымҳахаша даара ирацәан. Ахәылбыҽха Адгьылбжьаха иаҵәа иаҵанакуа амфитеатр аҿы имҩаҧысит аконцерт. Уи иалахәын аҭыԥантәи акәашареи ашәаҳәареи рансамбльқәа, еицырдыруа абаза, аԥсуа шәаҳәаҩцәа: Саида Габниеи уи наԥхгара зылҭо ахәыҷтәы гәыԥи, Аминат Напшева, Абзагә Ҵәыџьба, Вадим Тластанкулов, Валериа Ԥерцхьелиа, Иракли Џьумутиа, Лиудмила Хуажева, Наҭелла Чамба, Гәырами Инессеи Шереметоваа уҳәа убас егьырҭгьы.
Аиҧш зеиҧшу акультуратә усмҩаҧгатәқәа ҳаҧхьаҟагьы имҩаҧысраны иҟоуп. Усҟан еиҳагьы рымҽхак дырҭбаауеит, гәаҳәарыла зҽалазырхәуа рхыҧхьаӡара еиҳахоит. Аҧсуаа рашьцәа гәакьақәа абазақәеи дареи русеицура хәы змаӡам акы акәны иҟоуп. Аҭоурых иазхьаҧшны, рҷыдарақәа еиқәырхо, иаадыртуеит ҧхьаҟатәи амҩа лаша. Ҧхьаҟа, ашәышықәсақәа рҽыргәылак рҭоурых адаҟьақәагьы дырҧшӡалоит аҧсуааи абазақәеи.
Лана Коф-оглы,
Ревекка Воуба.
