Абиуро аартра амш инаркны Аџьынџьтәылатә еибашьра Дуӡӡа ианалага аҟынӡа есышықәса Аԥсны иаҭаауаз асасцәа рхыԥхьаӡара еиҳа - еиҳа иацлон. Аибашьра ашьҭахь, 1947–1948 шш. Амшын Еиқәа аԥшаҳәаҿы атуризм аиҭашьақәыргылара иалагеит.
1948 шықәсазы абиуро «Аҟәатәи атуристтә база аҟны иҟоу аекскурсиатә ҟәша» ҳәа ахьӡ рҿыцын, 1963 шықәса инаркны 1967 шықәсанӡа уи иахьӡын «Аԥснытәи аекскурсиатә база» ҳәа. Анаҩс, уи «Аҟәатәи аекскурсиақәеи аныҟәарақәеи рбиуро» ҳәа ҩаԥхьа ахьӡ ԥсахын. Уи иаҵанакуан атуризм азы Аԥснытәи аобласттә хеилак. Ԥыҭрак ашьҭахь абиуро Асовет Еидгылаҿы иҟоу иреиҳау абиуроқәа жәаба рхыԥхьаӡараҿы иҟалеит. Араҟа иааиԥмырҟьаӡакәа аус руан 150-ҩык, акурорттә сезон азы акәзар – даҽа 30-ҩык рҟынӡа аусзуҩцәа ацлон. Урҭ рхыԥхьаӡараҿы иҟан аԥышәа ду змаз аекскурсиамҩаԥгаҩцәа.
Аҟәатәи абиуро даараӡа ира­цәаны аекскурсиатә цагамҩақәа аман. Уи аусура иамҽханакуан Аԥсны мацара акәымкәа, Асовет Еидгыла зегьы. Атуристцәа аиҳарак иазҿлымҳан Асовет Еидгыла ақалақь дуқәа рахь аекскурсиақәа мҩаԥызгоз аҳаиргәыԥқәа, ату­ристтә дәыӷбақәа рыла Абжьаратәи Азиа, Урыстәыла ахьтәы мацәаз ҳәа изышьҭоу амаршрут ала аныҟәара, Ленинград ақалақь, иара убас Поволжие, Прибалтика, Украина, Қарҭ, Бақәа уҳәа рҭаара. Аҟәатәи амшынбаӷәаза усҟан иадна­кылон ­акруизтә дәыӷба дуқәа. Адәыӷбақәа «Россия», «Победа», «Грузия», «Абхазия», «Адмирал Нахимов» рыла атуристцәа Болгариа, Румыниа, Ҭырқәтәыла, Бырзентәыла уҳәа атәылақәа жәпакы ирҭаауан.
Нхыҵ-Кавказ ареспубликақәа, Ҟрым аладатәи аган рахь автобусла екскурсиақәа хыԥхьаӡара рацәала ауаа аднаԥхьалон. Акырӡа ирацәаҩны атуристцәа амшын аԥшаҳәа аҟынтәи Нхыҵ-Кавказ аиҩхаақәа рҟынӡа, Кавказтәи ашьхеибаркыра хада иахысны Ҭеберда, Домбаи инаӡаны шьҭахьҟа игьежьуан.
Аԥсны иаҭаауаз асасцәа усҟан, иахьа еиԥшҵәҟьа аӡиа Риҵахь аекскурсиақәа рымҩаԥгара, иара убас Афон Ҿыци аҳҭнықалақьи рҿы аҭыԥ ԥшӡарақәа рбара даараӡа иргәаԥхон. Иргәаԥхон жәаҳәарада, иара убас Аҟәатәи аӡымҽхак ала акатерқәа ирықәтәаны аныҟәарақәа. Еиҿкаахон убасҵәҟьа Гагреи Пицундеи рахь мшынла аныҟәарақәагьы.
Асовет Еидгыла ахыбгалара, ақырҭуа-аԥсуа еибашьра атуристтә инфраструктура ааха ӷәӷәа анаҭеит. Уи иахьагьы иуныруеит. Аха Аҟәатәи абиуро уажәгьы Аԥсны атуристтә еиҿкаараны иҟоуп, Аԥснытәи акурортқәа рыхьӡ-рыԥша аиҭашьақәыргыларазы аус ауеит.
Мшаԥымза 8, 2016 шықәса рзы иаԥҵан Ареспублика Аԥсны акурортқәеи атуризми Рминистрра аҟны иҟоу, атуристтә усхк атерриториатә еилазаарақәа еидызкылаз Ареспубликатә унитартә наплакы «Амилаҭтә Туристтә Еилазаара». Акурортқәеи атуризми Рминистрра Аԥсны «Амилаҭтә Туристтә Еилазаара» анапхгараҭара Аҟәатәи аекскурсиақәеи аныҟәарақәеи рбиуро аԥҵара 90 шықәса ахыҵра инамаданы ирыдныҳәалоит.
«2016 шықәса раахыс Амилаҭтә Туристтә Еилазаара анапхгареи аколлективи ламысцқьала рҽазҵәылхны рсура нарыгӡоит, Аԥсынтәыла иаҭаауа атуристцәа ргәы иҭымҵәо, иреиӷьу ацәаныррақәа рызцәырҵырц азы ирылшо зегьы ҟарҵоит.
Атуризм Аминистрра «Амилаҭтә Туристтә Еилазаара» инанагӡо аусура ахә ҳаракны иашьоит, еиуеиԥшым азҵаарақәа рганахьала уи иҟанаҵо адгыларагьы азгәанаҭоит.
Аизҳазыӷьареи аманшәалареи, ахирреи аихьӡарақәеи шәзеиӷьаҳшьоит!» – ҳәа ахәҭакахьала иазгәаҭоуп адныҳәаларатә цҳамҭаҿы.