Витали Валериан-иҧа Шариа диит (26.12.1952) Смоленск ақалақь аҟны. СССР ажурналистцәа Реидгылеи (1979), Аҧсны ажурналистцәа Реидгылеи, Аҧсны ашәҟәыҩҩцәа Реидгылеи (1997) дрылан.
Аҵара иҵон Смоленсктәи абжьаратәи ашкол, нас – Аҟәатәи абжьбатәи абжьаратәи ашкол аҟны. Белоруссиатәи аҳәынҭқарратә университет ажурналистика афакультет далгеит (1974) «арадиои ателехәаҧшреи» рзанааҭ ала.
Аамҭак азы аус иуан корреспондентс Могилиов ақалақь арадиои ателехәаҧшреи рзы Акомитет акорреспондентс. 1975ш. раахыс Аҧсны дынхоит. Аусура далагоит Гәылрыҧшьтәи араионтә газеҭ «Дроша» аредакциаҿ. Аамҭакала дкьыҧхьуан агазеҭ «Советская Абхазия» аҟны, ашьҭахь – ари агазеҭ аҟны корреспондентс далагеит, нас – апартиатә бзазара аҟәша деиҳабхеит, уи нахыс – аполитика аҟәша. 1984 ш. консультантс мызқәак аус иуан Аҧсны ашәҟәыҩҩцәа Реидгыла аҟны. Ҩаҧхьа агазеҭ «Советская Абхазия» ашҟа дхынҳәуеит. 1991 ш. сентиабр инаркны – агазеҭ «Республика Абхазия» аредактор ихаҭыҧуаҩыс дыҟан.
Аҧсны Аџьынџьтәылатә еибашьраан (1992-1993) абри амаҵуреи арратә корреспондент иусуреи еидибалон. 1994 ш. февраль мзазы иаҧиҵеит иҳәынҭқарратәым ауаажәларра-политикатә газеҭ «Эхо Абхазии, иахьа уажәраанӡагьы уи аредактор хадас аус иуан.
В. Шариа истатиақәеи иочеркқәеи рнылон Москватәи апериодикатә ҭыжьымҭақәа: «Журналист», «Юность», «Огонек»; агазеҭқәа: «Комсомольская правда», «Правда», «Известия», «Независимая газета», «Литературная газета».
В. Шариа иповестқәеи, иажәабжьқәеи, иочеркқәеи кьыҧхьын ажурналқәа: «Алашара», «Абаза», «Аҟәа-Сухум», «Наш современник» (Москва), «Литературная Кабардино-Балкария» (Нальчик); алитературатә еизга «Аукцион», агазеҭқәа: «Эхо Абхазии», «Еҵәаџьаа», аизга «Ахаҵарашәа». Ажәеинраалақәа. Ажәабжьқәа. Астатиақәа. – Песень мужества. Стихи. Рассказы. Статьи. (Аҟәа – Сухум, 1995) уҳәа рҟны.
Апрозатә ҩымҭақәа еидызкыло ашәҟәқәа жәпакы дравторуп. Еиқәиршәеит «Ақырҭуа-аҧсуа еибашьраан (1992-1993) афронттә анекдотқәа, еиқәиршәеит, авторсгьы дамоуп ақырҭуа-аҧсуа еибашьра иазку аҭоурых-публицистикатә шәҟәы «Абхазская трагедия» (Шәача, 1993) уҳәа егьырҭгьы.
Аурысшәахь еиҭеигеит аҧсуа шәҟәыҩҩцәа, урҭ иреиуоуп Н. Ҳашыг, А. Лагәлаа, И. Хәарцкиа уҳәа рпрозатә ҩымҭақәа.
Еиуеиԥшым ашықәсқәа раан иҭижьит ашәҟәқәа: «Абхазские яблоки» (Аповест, Аҟәа 1986); «Взятка» (Аповести ажәабжьқәеи. М., 1988); (ВЛКСМ Ацентр Комитет абиблиотека «Молодая гвардия». 1988. №9 (324); «На солнечной стороне улицы». (Аповести ажәабжьқәеи, Аҟәа, 1990); «Танк не страшнее кинжала» (Ажәабжьқәа, Аҟәа, 1998); «Букет Абхазии» (Аповестқәеи ажәабжьқәеи, Аҟәа, 2015).
Аԥсуа журналистикаҿы имҩашьауа зышьҭа анызҵаз, злагалагьы шьардоу Витали Валериан-иԥа Шариа игәалашәара лаша рыцзаауеит иколлегацәеи иҩызцәеи.
* * *
Иаамҭамкәа зыԥсҭазаара ҿахҵәаз Аԥсны зҽаԥсазтәыз ажурналист Витали Валериан-иԥа Шариа иҭаацәеи иҭынхацәеи ирыдышшылоит агазеҭ «Аԥсны» аредакциа анапхгареи аусзуҩцәеи. Ихьӡ хашҭра ақәымзааит.
