Ақалақь иамоуп ахатәы герб иара убас еицырдыруа алозунг- "Очамчыра-город мира!". Араҟа иит имаҷҩымкәа еицырдыруа ауаа. Витали Дараселиа-Асовет шьапылампыл асҩы СССР зҽаԥсазтәыз аспорт азҟаза. Нелли Ешба-раԥхьатәи аԥсуа режиссиор, Аԥсны жәлар рартист, Георги Товстоногов иҵаҩы. Александр Шьоуа-еицырдыруа акомпозитор, ашәаҳәаҩ, Аԥсни Аахыҵ Уаԥстәылеи зҽаԥсазтәыз артист.
Ақалақь амш инамадан аныҳәатә усмҩаԥгатәқәа рацәаны иазԥхьагәаҭоуп. Аиҿкааҩцәа иалыркааит аҭыԥқәа хԥа.
Актәи – амшын аԥшаҳәа.Араҟа имҩаԥгахоит ақыҭанхамҩатә цәыргақәҵа, Очамчыра араион анапҟазацәа иҟарҵо аалыҵқәа рцәыргақәҵа, анаҩс анард азы иаарту атурнир мҩаԥгахоит, уи зегьы рхы аладырхәыр рылшоит.
Аҩбатәи аҭыԥ-ацентралтә баҳча ауп. Уаҟа ахәыҷқәа рзы агәырҿыхагақәа мҩаԥысуеит асааҭ 16:00 инаркны 18:00 рҟынӡа. Апрограмма иаҵанакуеит еиуеиԥшым ахәыҷтәы персонажцәа рԥыларақәа, аквестқәа, ақьаадтә шоу уҳәа убас егьырҭгьы.
Ахԥатәи аҭыԥ-ақалақь ацентртә шҭа ауп, уаҟа асааҭ 19:30 рзы аԥсуа естрадақәа злахәу аконцерт мҩаԥысуеит, иара убасгьы асасцәа рзы ажәлар рашәақәеи рыкәашарақәеи мҩаԥгахоит. Амш хыркәшахоит аныҳәатә феерверкқәа рыла, асааҭ 22:00 рзы.

Аманда Анталаа