Астудентцәа ргәыԥ напхгара рзыруеит Аҳәынҭқарратә усбарҭа акафедра арҵаҩы Лана Харчлааи, аекономикатә факультет акорреспонденттә ҟәша амаӡаныҟәгаҩ Марта Ашәԥҳаи.
Аусмҩаԥгатә нагӡоуп Урыстәылатәи Афедерациа аҭҵаареи иреиҳау аҵареи Рминистрра Афедералтә ҳәынҭқарратә Усбарҭа "Асоциоцентри" рыцхыраарала.
Апроект ахықәкы хадас иамоуп урыстәылатәии аҳәаанырцәтәи астудентцәеи рыбжьара ауаҩытәыҩсатә, акультуратә,амилаҭбжьаратә акоммуникациақәа рышьақәыргылара.
Ҳазҭоу ашықәс азы "Аԥхынтәи Ауниверситет" рхы аладырхәуеит 13-тәылак рҟынтәи 400-ҩык инареиҳаны астудентцәа: Урыстәыла, Аԥсны Аҳәынҭқарра, Азербаџьан, Белоруссиа, Аладатәи Африка, Бразилиа, Чин, Индиа, Иран, Казахстан, Таџьикстан, Туркменистан, Узбекистан рҟнытә.
Аԥхынтәи ауниверситет апрограмма иалахәуп Казантәи афедералтә университет иреиӷьу арҵаҩцәеи аиндустриа аспециалистцәеи. Имҩаԥгахоит алекциақәа, асеминарқәа, апрактикатә классқәа, аурыс культуреи аурыс бызшәеи рдырразы аекскурсиақәеи аусмҩаԥгатәқәеи.
Аԥхынтәи Ауниверситет хыркәшахоит ԥхынгәымза 22 рзы.
Аманда Анталаа