Уи иалахәын аекономика аминистр Кристина Озган, Аԥыза-министр иабжьгаҩ Дмитри Шамба, аекскурсиамҩаԥгаҩцәа риндустриа аиҳабы Дмитри Акәциа, ассоциациа «Абхазгид» алахәыла Линда Амԥар, Кристина Лакербаиа, Анна Калиагина, Белла Џьынџьал.
Дмитри Акуциа иқәгылараҿ иҳәеит, дара Жәлар Реизарахь ишнаргаз иӡбатәу азҵаарақәа. «Иҟоуп иҳауз аҭакқәа, аха зҭак ҟаҵамгьы маҷым, атәыла анҭыҵынтә иаауа ҳара ҳтәыла азакәан дықәныҟәозароуп, аекскурсиақәа анымҩаԥырго ҳара ­ҳ-екскурсиа амҩаԥгаҩцәа рыцзароуп, ҳҭоурых ҳара ирызнаҳгозароуп. Ари идеологиоуп», – иазгәеиҭеит иара.
Линда Амԥар лықәгылараҿы дазааҭгылеит аекскурсиа амҩаԥгара азин змам Урыстәылатәи аекскурсиа амҩаԥгаҩцәа дара русураҿы аԥырхага шрырҭо, насгьы урҭ ашәахтәқәа шырымшәо. Иалацәажәан иара убас ашьхатә туризм, ҳәара аҭахым, ари даара ишәарҭоу туруп, аха ашьақәыргылара, амҩаԥгара алшоит. Ҳара иҳалшоит аусеицура абри ахырхарҭала. Ҳзадгылом ҳҭоурых еицакны еиҭазҳәо аекскурсиамҩаԥгаҩцәа русура. Убри аан ҳара аӡәгьы ҳаиҿагылаӡом, акызаҵәык ҳзыҳәо ҳусура аиқәырхара ауп, ҳәа азгәарҭон зегьы рықәгылараҿы.
Анна Колиагина илҳәеит, «абра маӡала аекскурсиақәа мҩаԥызго, иара уаҟа Урыстәылагьы абас ауп рхы шымҩаԥырго. Иҟоуп Шәача атуристтә компаниақәа ҳаилызкаауа, азакәан ишаҳәо иқәныҟәо. Атуризм Аминистрра амчала имҩаԥыргон ареидқәа, аилагарақәа ҟазҵо раанкыларазы, уажәтәи аамҭазы урҭгьы русура аанкылоуп.
Аекономика аминистр Кристина Озган илҳәеит арҭ иқәгылоу апроблемақәа рыӡбара шаҭаху, ҳәара аҭахым, урҭ шьақәыргылатәуп ҳара ҳтәылауаа русура иахәаратәы. Убри аан Дмитри Шамба иажәақәа рыла, аекскурсиа амҩаԥгаҩцәа рызҵаарақәа рыӡбаразы аамҭа аҭаххоит, иахьазы ҿыцра ҳәа акгьы рзалагалом.