Аҵыхәтәантәи ашықәсқәа рзы «Аҧснытәи аихамҩа» ахылаҧшра бзиа амоуп атәыла анапхгара рганахь ала.
Анаплакы иаҵанакуа аобиектқәа рҿы иааиҧмырҟьаӡакәа имҩаҧысуеит аиҭашьақәыргыларатә усурақәа, имаҷым ахархәарахь ирыҭоугьы.
Ареспубликатә унитартә наплакы «Аҧснытәи аихамҩа» анапхгареи аусзуҩцәеи аҵыхәтәантәи ашықәсқәа ирылагӡаны анаплакы иаҵанакуа аинфраструктура аиҭашьақәыргыларазы имҩаҧыргахьоу аусурақәа маҷым. Очамчыратәи амшынтә баҕәазахьы иаарго аидарақәа рхыҧхьаӡара акыр иахьырацәахаз азы ихымҧадатәны иқәгылеит азҵаара, хышәи ҩынҩажәи жәаба метра зоура ыҟоу аихамҩа ҿыц ашьҭаҵаразы. Аамҭа кьаҿк иалагӡаны арҭ аусурақәа рымҩаҧгара алыршан. Аҧснытәи аунитартә наплакы «Аҧсны аихамҩа» анџьныр хада Леонид Ҟәыруа иажәақәа рыла, ари аҭыҧ аҿы аидарақәа маҷымкәан иааргоит иргоит, убри инамаданы ауадаҩрақәа цәырҵлон аихамҩа ҭыҧ-ҭыҧла иахьеиқәшәамыз иахҟьаны. Аихама аусзуҩцәа рус еиҳа иманшәалахрц азы иӡбан ацәаҳәа ҿыц ашьҭаҵара азҵаара.
Хәышә метра иҟоу аихамҩатә цәаҳәа ҿыц ашьҭаҵара иаҿуп Драндатәи аихамҩатә аанҿасырҭаҿгьы. Араҟа аспециалистцәа аус руеит рҽеиҭныҧсахланы. Аҭыҧ иадгалоуп атехника ҷыда. Иазҧхьагәаҭоу аусурақәа зегьы рхыркәшара анаҩс адәыҕбақәа аҧсылмӡи абҕанҷи араҟа икарыҧсартә еиҧш аҭагылазаашьа роуеит.
Зымҽхак ҭбаау аусурақәа мҩаҧысуеит Аҟәатәи аихамҩатә вокзал ахыб ақәҵаразгьы. Анаплакы ахарџьқәа рыла иаархәахьеит иахәҭоу амаҭәахәқәа зегьы. Леонид Ҟәыруа иажәақәа рыла, аиҭашьақәыргылара ахыркәшара азгәаҭоуп ҳазҭоу ашықәс цәыббрамза нҵәаанӡа. Анаплакы анапхгара аҧхьаҟагьы иазгәаҭан ирымоу аусурақәа маҷым.
Ҳазҭоу ашықәс иалагӡаны имҩаҧыргараны иҟоуп Кәыдры аӡиас иху аихамҩатә цҳа аҟны аиҭашьақәыргыларатә усурақәа. Иара иагу-иабзоу Урыстәылантәи аспециалистцәа ааганы иҭырҵаахьеит, иақәхарџьтәу еилыркаахьеит, аусурақәа ретапқәа азгәарҭахьеит. Хара имгакәа иазгәаҭоуп Афон -ҿыцтәи адәыҕба аанҿасырҭа ахаҿра арҧшӡаразы аусурақәа рылагара. Убасгьы хара имгакәа аихамҩа амшын иахьыҵнаӡәӡәаауа аҭыҧқәа хҧа рҟны иҭадырҭәараны иҟоуп зымҽхак ҩышә ҧшьыркца метра инаӡо абетонтә ҭӡы.
Елана Лашәриа
