Шоҭа Арсҭаа Аԥсны аҭҵаарадыррақәа Ракадемиа (1997 – 2013шш) актәи апрезидентс иҟаз, Аԥсны аҭҵаарадыррақәа Ракадемиа ахьтәы медал занашьоу раԥхьатәи ҵарауаҩын. Шоҭа Ҟасҭеи-иԥа Арсҭаа абызшәадырҩы, аԥсуа бызшәа аграмматика аспециалист, афилологиатә наукақәа рдоктор (1987ш.), апрофессор (1989ш.), Аԥсны аҭҵаарадыррақәа Ракадемиа алахәыла иаша, Аԥсны анаукақәа Ракадемиа апрезидент (1997ш.), ареспублика иреиҳаӡоу ашкол зҽаԥсазтәыз аусзуҩ Шоҭа Арсҭаа диит Гәдоуҭа араион Оҭҳара ақыҭан, 1929 шықәса март 10 азы. Иҵарадырратә мҩа ахы акуеит Қарҭтәи аҳәынҭқарратә университет аҟны. 1955 шықәсазы афилологиатә факультет Кавказтәи абызшәақәа рыҟәша даналга ашьҭахь, иҵара иациҵоит Қырҭтәылатәи ССР аҭҵаарадыррақәа Ракадемиа иаҵанакуаз абызшәадырра Аинститут аспирантураҿы. Акандидаттә диссертациа ихьчеит 1961 шықәсазы.
1958 шықәса инаркны иахьа уажәраанӡа аус иуан Дырмит Гәлиа ихьӡ зху Аԥсуаҭҵааратә институт аҟны. Владислав Арӡынба инапынҵала 1997 шықәсазы иаԥҵаз Аԥсны аҭҵаарадыррақәа Ракадемиа раԥхьатәи ахадас иҟаз Шоҭа Ҟасҭеи-иԥа Арсҭаа иоуп.
Ианашьоуп "Аџьа аветеран" ҳәа ахьӡ ҳаракы, иара убас Аԥснытәи ССР Иреиҳаӡоу Асовет Апрезидиум Аҳаҭыртә шәҟәы.
Шоҭа Ҟасҭеи-иԥа ишәҟәы "Аԥсуа бызшәа аграмматика" азы ианашьоуп Гьаргь Ӡиӡариа ихьӡ зху Аҳәынҭқарратә премиа. Ш. Арсҭаа икьыԥхьхьеит 40 инареиҳаны аҭҵаарадырратә усумҭақәа, урҭ рхыԥхьаӡараҿы амонографиақәагьы. Иара убас дравторуп аԥсуа ҵараиурҭақәа рзы иҭыжьу аԥсуа бызшәа арҵага шәҟәқәеи ацхыраагӡақәеи.