Аконцертә программа ааиртит Аԥсны зҽаԥсазтәыз артист, аскрипкарҳәаҩы Виктор Абрамиан-Ешба. Анаҩс иқәгылеит анагӡаҩцәа-ҿарацәа – Москватәи аконсерваториа аҟны иҟоу анагӡаратә ҟазара Академиа астудентцәа: апианинорҳәаҩы Лана Адлеиба, Каи Хупориа, Виктор Абрамиан-Ешба иҵаҩы, альтарҳәаҩы Пиотр Бердников.
Ахәаԥшцәа хнахит Софиа Сақаниа лыбжьы, лара Урыстәыла зҽаԥсазтәыз артистка, Аԥсны жәлар рартистка Алиса Гыцба лаԥшьгарала имҩаԥгаз II Жәларбжьаратәи амузыкатә конкурс аҿы Гран-при лгеит.
Анагӡаҩцәа ҿарацәа адгылара рыҭаразы арахь иааит акомпозитор, адирижиор Нодар Ҷанба, ашәҟәыҩҩы Денис Чачхалиа, аҭоурыхҭҵааҩы Лариса Ҵәыџьба, абжьгаҩ-ацҳаражәҳәаҩ Мадина Аҩӡба, Москва ақалақь аҿы инхо аԥсуаа.
«Даараӡа уеигәырӷьаратәы иҟоуп Аԥсны иахьеиҵагыло аҟыбаҩ злоу амузыкантцәеи ашәаҳәаҩцәеи рабиԥара», – абас анылҵеит Феисбук аҿы иҟоу лдаҟьаҟны Дырмит Гәлиа имаҭа Татиана Гәлиа.