Ареспубликатә ҳәынҭқарратә усҳәарҭа «Аҧснымедиа»
Динара Смыр Ольга Лиубимова Амилаҭтә сахьатә галереиа афонд ахәҭа аиҳарак абылра инамаданы Аԥсны иаиуз ацхырааразы иҭабуп ҳәа лалҳәеит.
«Ҳзықәшәаз арыцҳараҿы Шәара иҳашәҭаз адгылареи ацхыраареи рзы идуӡӡаны иҭабуп ҳәа шәаҳҳәоит», – лҳәеит Динара Смыр.
Ахәҭакахьала, Ольга Лиубимова Ацәыргақәҵатә зал хадаҿы иҟалаз абылра иацәынхаз асахьақәа рреставрациа аганахьала аринахысгьы ацхыраара аҟаҵара дшазхиоу азгәалҭеит.
Аганқәа иара убас 2024-тәи ашықәс азы акультуреи аҟазареи русхк иадҳәалоу азҵаарақәа ирылацәажәеит.