Атема хада-амилаҭтә хаҿра аиқәырхареи аҭоурыхтә ԥсадгьыли амадареи ауп ҳәа аанацҳауеит Аԥсны адәныҟатәи аусқәа рминистрра апресс-маҵзура.
Алахәылацәа бзиала шәаабеит ҳәа реиҳәеит Урыстәылатәи Афедерациаҿы иҟоу Аԥсны ацҳаражәҳәаҩ Алхас Кәыҵниа. Иара иазгәеиҭеит Санкт-Петербург ҳџьынџьуаа рабиԥарақәа рҵардырраҿы иааннакыло аҭыԥ ҷыда, аиҿкааҩцәа иҭабуп ҳәа реиҳәеит активла русуразы.
Аиԥылара иара убас рҽаладырхәит Германиеи, Ҭырқәтәылеи, Франциеи рҟынтәи адиаспора — еизаз рахь авидеоааԥхьарақәа нарышьҭит ФРГ иҟоу Аԥсны ахаҭарнак Хьыбла Амҷбеи Урыстәылатәи Афедерациаҿы иҟоу ацҳаражәҳәарҭа абжьгаҩ-ацҳаражәҳәаҩ Кан Ҭаниеи.
Ҳџьынџьуаа ҿарацәа алацәажәеит акультуратә аԥшьгарақәа, адиаспора аидкыларазы апроектқәа, Петербургтәи астуденцәа реидгылара атрадициақәа рыцҵара.
