Абри атәы иҳәеит аенергетика аминистр Баҭал Мышәба атәыла ахада Бадра Гәынбеи аминистрцәа Реилазаара алахәылацәеи реилацәажәараҿы.
«Ари аус иацҵахоит. Ҳара аҳасаббаратә мыругақәа рықәыргылара адагьы афымцаҳақәа 0,4 кВ ҳарҿыцуеит. Ареспублика унитартә наплакы «Амшынеиқәафымцамч» 156 километра рҟынӡа акаҭақәа аԥсаххьеит», – ҳәа адырра ҟаиҵеит Мышәба.
Жәа-мзы рыҩнуҵҟа ареспубликаҿы афымцамч ахархәара иартәеит 2 млрд 66 млн киловатт-сааҭ, уи ҵыԥх аиԥш-зеиԥшу аамҭахәҭа азы аасҭа 85 млн киловатт-сааҭ рыла еиҳауп.
«Жә-мзы рыҩнуҵҟа аизгара аҩаӡара иартәеит 57%. Уи ҵыԥх арбага аасҭа 5% рыла еиҳауп. Ахатәхаҿқәа реиԥш аиуристтә хаҿқәагьы рҟынтәи афымцамч ахәԥса аизгара адинамика бзиа амоуп», - ҳәа адырра ҟаиҵеит аминистр.
Баҭал Мышәба иара убас иааиуа аӡынтәи аамҭа аҽазыҟаҵара ахҳәаа аиҭеит:
«Џьвартәи аӡеизакырҭаҿы аӡы аҩаӡара 509 метра ыҟоуп, уи ҵыԥхтәи арбага аасҭа 44 метра рыла еиҳауп уҳәар алшоит. Акоммерциатә фымцамч аахәара ҳҽазыҟаҳҵеит. Аиқәшаҳаҭра ҳабжьаҳҵеит цәыббрамзазы, аха фактла аагарақәа макьана ирыламгацт, избанзар аӡы аҩаӡара акыр иҳаракны иаанхоит. Иаҭахханы ишыҟалалак афымцамч аашьҭхоит».
Аминистр иара убасгьы адырра ҟаиҵеит Аԥсны амратә генерациазы азакәан апроект аҵыхәтәантәи авариант ахыркәшарахь ишнагоу ала. Уи ахықәкы хада-ареспубликаҿы ахатәы ҩныҵҟатә генерациа ахыҵхырҭақәа раԥҵара ауп.
Аминистр данизыӡырҩы, аҳәынҭқарра ахада Бадра Гәынба иазгәеиҭеит анапынҵақәа рыҭеижьҭеи акыр шҵуа, иҳәеит азакәан апроект аус адулара арццакра шхымԥадатәиу.
«Арҭ аӡбамҭақәа Апарламент ахь инагатәхоит. Уаҟа апроцесс еиҵахоит. Уиаҟара аамҭа ҳамаӡам», - иҳәеит атәыла ахада.
Аҳәынҭқарра ахада иара убасгьы инаҵшьны иазгәеиҭеит Урыстәылантәи иаарышьҭуа афымцамч ахә ахшәаара иабзоураны фактла атәылауаа асоциалтә дгылара шроуа.
«Афымцамч 5,5 мааҭ ахаҳшәаауеит, ауааԥсыра ҩба-ҩба мааҭ ҳәа иаархәоит. Уи атәылауаа рҿаԥхьа аҳәынҭқарра инанагӡо асоциалтә ҭакԥхықәра иаҿырԥшыгоуп. Аха акоммерциатә наплакқәеи аусбарҭақәеи рзы — абизнес аԥара ахьарҳауа — афымцамч злааҳхәо ахәԥса иаҟаразароуп иршәо», - иҳәеит ахада.
Иара Аиҳабыра рнапы ианиҵеит акоммерциатә наплакқәа рзы атарифқәа реиҭакразы ажәалагалақәа аздырхиарц.
«Ауааԥсыра ртәы ҳҳәозар, ҳтәылуаа рыцхырааразы ҳсоциалтә хыдҵақәа зегьы шынаҳагӡоз еиԥш рынагӡара иацаҳҵоит», – ҳәа инаҵшьны иазгәеиҭеит атәыла ахада.
