Агрипп чымазара змоу ауаҩы ихьанҭаны ихигозар дымԥшыкәан аҳақьым дидҵаалар ахәҭоуп. Араҟа иҳәатәуп, агрипп шумоу аазырԥшуа еиҳа ирдыруа ацәырҵрақәа ишреиуоу-амцашоура ҳаракы, аиҵасра аҟынӡа ахьҭа акра, игәыҿжәагоу аимҳәа, ахәдахьаа, ахыхь, аԥынҵеихачра, абаҩхьаа. Ҳәарада, агрипп зыхьуа зегьы еиԥшны ирхыргом, уи  ауаҩы игәабзиара аҭагылазаашьа иаҿыԥшуп. Аимуннитет бзиа змоу еиҳа имарианы ирхыргоит.

Адунеизегьтәи агәабзиарахьчаратә еиҿкаара иамоу астатистикатә рбагақәа инарықәыршәаны агрипп чымазара ихьыр ауеит дарбанзаалакгьы, қәреилых ҟамҵакәан. Арбагақәа иаадырԥшит  Аԥсны, асезонтә грипп еиҳа аҿиара шамоу егьырҭ ачымазарахкқәа раасҭа. Асезонтә грипп ҳәа иашьҭоуп  авирусқәа ицәырырго аҿктәы чымазара. Аҳақьымцәа ражәақәа рыла, еиҳа аҿиара рымоуп  ахкқәа хԥа: А, Б, С.

А, Б авирусхкқәа аҳауа иалоуп, асезонтә грипп дара роуп ицәырызго.  Арҭ аҩ-хкык  ԥхьаӡоуп  еиҳа ихьанҭаны ауаҩы ихиго ҳәа. Убри инамаданы, есышықәса, агәабзиарахьчара аминистрра  ауааԥсыра иҟарҵар ахәҭоуп ҳәа ирабжьнаго, агрипп аҽацәыхьчаразы авакцинақәа ирылоуп  А, Б авирусқәа ирԥсыҽӡоу рыштаммқәа. Ҳтәылаҿы иалыркаалоит  авирус С аштаммгьы, аха уи еиҳа иԥсыҽу ҳәа иԥхьаӡоуп,  имарианы имҩасуеит, ауаҩгьы еиҳа иԥсыҽны ихигоит.

Сынтәатәи аӡынразы ирацәаҩуп асезонтә грипп зыхьыз атәыла ауааԥ­сыра. Ажь­ырныҳәамза анҵәамҭазы еиҳаракгьы ирацәаҩхеит аҳақьымцәа ирыдҵаалаз рх­ыԥхьаӡара. Зегь раасҭа агрипп чымазарахкы уадаҩны ирхыргоит ахәыҷқәеи егьырҭ ачымазарахкқәа зцәа иалоу аиҳабацәеи. Ареспубликатә ахәыҷтәы хәышәтәырҭаҿы агрипп чымазареи егьырҭ аҿктәы чымазарахкқәеи змоу ахәыҷқәа рыдыркылаӡом, урҭ рышьҭуеит Аҟәатәи аҿктәы  хәышәтәырҭахь. Ареспубликатә ахәыҷтәы хәышәтәырҭа аҳақьым хада Инесса Камлиа лажәақәа рыла,  дара ирыдыркыло ахәыҷқәа зчымазара асоматикатә ҟазшьа амоу роуп. Даҽакала иаҳҳәозар, урҭ ир­ыхьуа инфекциатә (ҿктәы) чмазараӡам.  «Ҳара ҳҟны ишьҭоу  аиҳаракгьы агастроентерологиатә, анервтә система иадҳәалоу ачымазарақәа змоу, абаҩԥҵәа злоу,  агәыхь, ахыхь уҳәа иаргәамҵуа  апациентцәа роуп. Асоматикатә пациентцәеи аинфекциа змоу ачымазыҩцәеи еиламзар ауп. Ари ахәышәтәра аԥкаанҵа зыӡбаз ҳара ҳакәӡам, уи иқәныҟәоит адунеи зегьы аҿы», ҳәа азгәалҭеит Инесса Камлиа.

Аҿктәы чымазарақәа  аамҭалатәи рцәырҵраан  ақәыӷәӷәара ду амоуп  Аҟәатәи аҿктәы хәышәтәырҭа. Аҳақьымцәа уахыки-ҽнаки рыҩ­нуҵаҟа ирыдыркылоит 150-ҩык ачымазаҩцәа . Ахәышәтәырҭаҿы ишьҭоуп 47-ҩык, урҭ реиҳараҩык ахәыҷқәа роуп. Аҟәатәи аҿктәы хәышәтәырҭа аҳақьым хада инапынҵақәа назыгӡо Дамеи Занҭариа иажәақәа рыла, иҳаҩсыз ашықәс азыҳәан аҳақьымцәа еиҳарак иалыркаауаз агрипп  «А» аштамм  акәын. Аҵыхәтәантәи аамҭазы еиҳа  лассы-лассы иуԥыло иалагеит «Б» аштаммгьы. «Иҵару асезонтә грипп ацәырҵрақәа зегьы иаҳдыруа роуп –зыртәара уадаҩу амцашоура ҳаракы, амгәахьаа, ирласны ааԥсара. Ахәыҷқәа  агрипп анрымоу рыхәда иаргәамҵуеит, акрыфареи аӡыжәреи  мап рцәыркуеит. Аиҳабацәа еиҳа имарианы ирхыргозар, ахәыҷқәа рзы асезонтә ҿктәы грипп ашәарҭара амоуп. Ианаамҭоу агәцаракра аҭамзар, аҽыхәышәтәра еиҳа иуадаҩхоит»,  иҳәеит Дамеи Занҭариа. Иара убасгьы, аҳақьым иазгәеиҭеит, сынтәатәи аӡынразы агрипп захьыз ауаа вируск акәымкәа ҩ-хкык иреиҳаны  анрыдырбалозгьы шыҟоу. «Арекорд шьақәзыргылазгьы дҳаман, –иҳәеит иара  длафуа. –Ҳчымазҩы ԥшь-вирус хкык иман, уи анаҩсгьы анализқәа рышьҭахь ишьақәыргылан абактериақәагьы ҩ-хкык ицәа ишалаз. Иҟалалоит  ҭаацәарак аҟны  хәыҷык вирусхкык анимоу, аҩбатәи даҽа хкык ицәа ианалоу. Ас иҟоу еибарчмазыҩуеит, ргәаҭараан иакымкәа-иҩбамкәа авирусхкқәа рцәа ишалоу шьақәдыргылоит. Урҭ  апациентцәа рыхәышәтәра аамҭа аҭахуп, насгьы  иӷәӷәоу ахәшәқәа  рыдгалатәуп» иҳәеит Аҟәатәи аҿктәы хәышәтәырҭа аҳақьым хада инапынҵақәа назыгӡо, Дамеи Занҭариа.

Асезонтә грипп иахылҿиаауа аепидемиа аҽацәыхьчара даара иуадаҩуп, аиҳаракгьы аҿктәы чымазарахкы аҿиара алмыршаразы аԥҟаррақәа  ианрықәныҟәам. Акарантин алагалаӡам. Ашколқәа, ахәыҷбаҳчақәа, иреиҳау аҵараиурҭақәа, аусбарҭақәа  аус руеит. Аԥсны аҵара аминистрра ауажәларра рыҽрымадаразы аҟәша аиҳабы Аслан Қәҭелиа иажәақәа рыла, аҵара аминистрра  хылаԥшра ду анаҭоит ҳтәыла араионқәеи  ақалақьқәеи рышколқәа рҿы аҭагылазаашьа зеиԥшроу. «Аминистрра аспециалистцәа  еснагь ирымадоуп аҭыԥантәи аҵара аҟәшақәа рнапхгаҩцәа. Есҽнытәи аҭагылазаашьа рдыруеит, уи ацашьа иацклаԥшуеит. Макьаназы, ашәарҭара цәырызго арбагақәа ыҟаӡам. Асезонтә грипп ацәырҵра аепидемиатә ҟазшьа аиур, ҳәарада, аӡбамҭа рыдыркылоит аамҭала аусура аанкыларазы», –иҳәеит Аслан Қәҭелиа.

Ахәышәтәырҭа иадҵаало  ачымазаҩцәа актәи ацхыраара рыҭараан хәыдаԥсада хәшәыла еиқәнаршәоит ахәышәтәырҭа, уи ахахьы иагоит Аҟәа ақалақь ахадара.  Астационартә чымазаҩцәа ҳәа изышьҭоу, ахәышәтәырҭаҿы ишьҭоу ирҭаху апрепартақәа рыла еиқәнаршәоит  агәбзиарахьчара аминистрра. Актәи ацхыраара аҟаҵаразы ихымԥадатәу ахәшәқәа зегьы ҳамоуп, иҳәеит Аҟәатәи аҿктәы хәышәтәырҭа аҳақьым хада инапынҵақәа назыгӡо Дамеи Занҭариа. Аҳақьымцәа  уахынлеи ҽынлеи еилымхкәа рзаанаҭтә уалԥшьа нарыгӡоит. Дара ауааԥсыра ирабжьыргоит  апрофилактикатә  ҟазшьа аҭаны авитаминқәа рыдкылара, ианаамҭоу аҳақьымцәа  рыдҵаалара, аҩны ахыхәышәтәра рҽазымккәа, лассы-лассы анапқәа сапынла рыӡәӡәара, иахьынӡауала ауаа рацәа рыламгылара,  ауада аҳауа цқьа аҩнаҵара, иара убасгьы ирцәааку ала аилыргара.

Елана Лашәриаԥҳа