Аԥсуа поет, апублицист, ауаажәларратә усзуҩы, ахәыҷтәы журнал «Амцабз» аредактор хада Инна Никәала-иҧҳа Аҳашба диит 1953 шықәса маи 20 рзы Очамчыра араион Ԥақәашь ақыҭан. СССР-и (1989) Аҧсни рышәҟәыҩҩцәа Реидгылақәеи Аԥсны ажурналистцәа Реидгылеи дрылан.
А. М. Горки ихьӡ зхыз Аҟәатәи аҳәынҭқарратә арҵаҩратә институт афилологиатә факультет далгеит (1979). 1977 ш. инаркны аусура далагеит агазеҭ «Аҧсны ҟаҧшь» аредакциаҿы корреспондентс. 1985 ш. нахыс Аҧснытәи аҳәынҭқарратә шәҟәҭыжьырҭа аредакторс дыҟан, ашьҭахь диасуеит ажурнал «Алашара» аҟәша аиҳабыс. 1995 ш. инаркны Д. И. Гәлиа Илитература-мемориалтә музеи деиҳабын. 2003-2005 шш. раан Аҧсны ашәҟәыҩҩцәа Реидгыла Алитературатә фонд аиҳабыс дыҟан. 2007 ш. раахыс ажурнал «Амцабз» аредактор хадас аус луан. Аԥсҭазаараҿы аԥышәа бзиа лырҳаит. Леиҿкааратә баҩхатәра ааԥшит Д. И. Гәлиа Илитература-мемориалтә музеи аиҳабыс даныҟаз, насгьы Аԥсны ашәҟәыҩҩцәа Реидгыла Алитературатә фонд данеиҳабыз. Ажурнал «Амцаб» аредактор хадас даниарга еиҳагьы илыднаҵоз рацәан ахәыҷқәа рдунеи иазааигәоу аҭыжьымҭа ҵакылеи хаҭабзиаралеи еиқәыршәаны аԥхьаҩцәа рызнагараҿы, уи ҭакԥхықәралагьы дазнеиуан. Аус ахьылуазаалакгьы аусзуҩцәеи лареи еилибакааны азеиԥш ус иазааԥсон, убри алагьы ҳдоуҳатә культура амаҵ руан.
Акьыҧхь аҟны дцәырҵит 1972 ш. инаркны. Лажәеинраалақәеи, лпоемақәеи, лочеркқәеи, лстатиақәеи рнылон ажурналқәа: «Алашара», «Абаза», агазеҭқәа: «Аҧсны ҟаҧшь», «Аҧсны», «Еҵәаџьаа», «Литературная газета» (Москва); аизгақәа: «Однажды в апреле. Ажәеинраалақәа» (Қарҭ, 1982), Ахаҵарашәа. Ажәеинраалақәа. Ажәабжьқәа. Астатиақәа» (Аҟәа, 1995); «Аҧсуа поезиа антологиа. ХХ ашә.» (Аҟәа-Москва, 2001; 2009) уҳәа егьырҭгьы.
Еиуеиԥшым ашықәсқәа раан иҭыжьын иаԥылҵаз лырҿиамҭақәа еидызкыло лышәҟәқәа жәпакы, урҭ рхыԥхьаӡараҿы иҟоуп иалԥшаау лажәеинраалақәеи лпоемақәеи згәылоу «Аизга» х-шәҟәыкны. Зхатә дунеи змаз апоет лырҿиамҭақәа амилаҭтә поезиа аҟны лагала бзианы иаанхоит.
Апоет Инна Аҳашба лгәалашәара хашҭра ақәымкәа иҟазаауеит уи аус лыцызуази лҩызцәеи ргәаҵаҿы.
Аԥсны ашәҟәыҩҩцәа Реидгыла
Агазеҭ «Аԥсны» аредакциа анапхгареи аусзуҩцәеи гәалсрала ауацәеи аҭынхацәеи ирыдышшылоит, амилаҭ газеҭ аҟны аус зухьаз апоет, апублицист, ахәыҷтәы журнал «Амцабз» аредактор хада, Аԥсны ажурналистцәа Реидгыла алахәыла Инна Никәала-иԥҳа Аҳашба лыԥсҭазаара дахьалҵыз инамаданы.
