Фазиль Искандер ихьӡ зху аурыс драматә театр ақалақь Горно-Алтаиск адраматә театр П.Кучиак ихьӡ зху асценаҿы иддырбеит аспектакльқәа «Ишьаарҵәырахаз ачареи», «Ахаҵа ҧшӡеи».

Атеатр анапхгаҩы Иракли Хынҭәба иҳәеит ақәгыларақәа қәҿиарадула ишымҩаҧысыз. Аҩбатәи амш азы Ареспублика Алтаи акультура аминистр Ольга Антародонова Аҳаҭыртә шәҟәы раналшьеит. «Ахаҵа ҧшӡа» аҧҵоуп Александр Островски ипиеса иалхны, 200 ш. диижьҭеи аҵра аиубилеи инамаданы.

Иракли Хынҭәба иазгәеиҭеит ари аныҟәара ус баша иаҧшьгоу шныҟәарам, ҳара ҳдоуҳатә ҧышәа аимадара шакәу. Иара аҧшьган Урыстәыла акультура Аминистрра апрограмма «Большие гастроли» аҳәаақәа ирҭагӡаны. Уантәи Аурыс театр амҩа хан Ҭаҭарсҭан, аҧшьбатәи аурыс театрқәа рфестиваль ашҟа. Уаҟа (Набережные Челны) идырбан Островски ипиеса «Ахаҵа ҧшӡа». Амҵәыжәҩақәа узҭо, Ф.Искандер ихьӡ зху атеатр актиорцәа қәҿиарала инарыгӡоз агастрольқәа, рықәгыларақәа ҳ-Аҧсны ахьӡ шьҭнахуеит, ахьтәы цҳа еиҧш егьырҭ ажәларқәа ҳарзааигәанатәуеит.

Уи шьақәзырҕәҕәо, аныҟәарақәа рышьҭахь, иаразнак, мышкы ахиаҵыхәеи иҭагӡаны Ф.Искандер ихьӡ зху аурыс драматә театр асценаҿ иддырбеит Ф.Искандер иҩымҭа иалху аспектакль «Софичка».

Ҳ-Фазиль ду ихыҧша арахь имҩахнагаз даара ирацәаҩын. Азал ду ҩндырҭәаауан Аҧсны асасцәа – аҧсшьаҩцәа. Ҳәара аҭахым «Софичка» аҟны иқәгылоу атема, есымшагьы актуалра аҵоуп, ихадароуп актиорцәа ррольқәа шынарыгӡо. Аҧсҭазаараҿ ацәгьеи абзиеи рышьхәа еивҵоуп. Араҟа иаарҧшуп абзиабара, аиура аҵакы, аиҩызара, милаҭцыҧхьаӡа дара рхатәы знеишьа, еибабашьа рымоуп, аха убри аан уи иаҳнарбоит Асовет Еидгыла еиднакылоз зегьы рҭоурых, рыҧсҭазаара.

Ароль хада налыгӡоит Аманда Кәарацхелиа (Софичка). Шамиль ироль наигӡоит – Осман Абыхәба, абригадир бырг – Џьамбул Жорданиа, Қьаазым – Рубен Депелиан, Маша – Милана Ломиа, арольқәа зегьы ахәыҷы инаиркны баҩхатәрала инагӡоуп.

Ахәаҧшцәа агәахәара ду шырнаҭаз, гәыла-ҧсыла ишыртәыртәыз рзыҵәахуамызт. Уи арҵабыргуан дыдраҵас игоз анапеинҟьабжьқәа. Ари аҩыза аҟазара ҳтеатр мацара акәым иӡырнаго уи ҳӡырнагоит зегьы, иӡырнагоит ҳажәлар ркультура, рҟазара. Ари хьтәы цҳа еимадагоуп ҳа ҳзы.

Наира Сабекиа