Уаҟа иазгәаҭоуп:
Ҳаҭыр зқәу Алықьса Ноча-иԥа!
Гәык-ԥсык ала ишәыдысныҳәалоит Шәирамш.
Шәара, зырҿиара Аԥснеиԥш, уи анҭыҵгьы еицырдыруа шәҟәыҩҩуп, ҳаамҭазтәи классикуп, зажәа акрылнадо уаажәларратә усзуҩуп. Ахә ашьара уадаҩуп иахьатәи аԥсуа литература, иахьатәи аԥсуа бызшәа аҿиараҿы Шәара шәлагаламҭа.
Шәара шәырҿиара зегьы ибзиаӡаны ианыԥшуеит даҽакы иаламҩашьо, иҷыдоу аԥсуа милаҭтә хәыцшьа, ҳмилаҭ ирҟазшьоу аԥсҭазааратә философиа. Аԥсуа цәа рыҟәнуп шәҩымҭа ссирқәа бырлашҵас иргәылаԥсоу ақәыԥшра, аҿара, абзиабара ахаҿсахьақәа. Амҽхак ҭбаауп, иҵаулоуп ҟазара дула иаашәырԥшуа азаҵәра, ажәра, аиԥырҵра атема.
Шәара шәажәабжьқәа, шәповестқәа, шәроманқәа, ҷыдала, ароманраԥсодиа «Асду» аԥсуа литература акырӡа изырбеиаз, аԥсуа ажәа аҵакы ҳаразкыз аԥҵамҭақәоуп. Алықьса Ноча-иԥа, Шәирамш аҽны ишәзеиӷьасшьарц сҭахуп ақәра ду, агәабзиара, агәамч, ишәыгымзааит аринахысгьы арҿиаратә гәазыҳәара.
Виачеслав Чрыгба
Аԥсны Ахада Аслан Бжьаниа афилологиатә ҭҵаарадыррақәа рдоктор, Аԥсны аҭҵаарадыррақәа Ракадема академик, астратегиатә ҭҵаарақәа Рцентр аиҳабы Виачеслав Чрыгба Имшира идиныҳәалеит. Уаҟа иазгәаҭоуп:
«Ҳаҭыр зқәу Виачеслав Андреи-иԥа! Гәык-ԥсыкала ишәыдысныҳәалоит Шәымшира!
Адунеи аҿы еицырдыруа аҵарауаҩ, Шәара Аԥсны жәлар рымаҵ жәуеит ауаажәларратә, аҳәынҭқарратә усзуҩк иаҳасабала, шәымчшәылшара ӷәӷәала иадышәҵоит Аԥсны аҳәынҭқарра аинтересқәа рыхьчара.
Шәлагаламҭа дууп Аԥсни аҳәаанырцәтәи аҳәынҭқаррақәеи рдипломатиатә, реиҩызаратә еизыҟазаашьақәа рырҿиараҿы. Гәыкала ҳаҭыр ақәҵатәуп Аԥсны иазку аҭҵаарадырратә, аҭоурыхтә иашара азҵаарақәа ааԥсарада ирзыҟашәҵо ахшыҩзышьҭра, иара убас ауаажәларратә, аиҿкааратә, аҳәынҭқарратә усура аганахьала аҭҵааҩцәа қәыԥшцәа разыҟаҵара, аԥсуа бызшәеи алитературеи реиқәырхара, рырҿиара».
Аҳәынҭқарра Ахада аҵарауаҩ изеиӷьишьеит ақәҿиарақәа, агәабзиара, абзиарақәа зегьы.
