Аҧхьаӡа иргыланы аиқәшәара зызкыз ахатәы бызшәа – аҳәынҭқарратә бызшәа аиқәы­рхарери арҿиареи роуп. Аҧсуа бызшәа аҭагы­лазаашьа азы ргәаанагарақәа рҳәеит, иҟаҵа­тәугьы иаҩымсит: Алеқсандр Чамагәуа, Владимир Занҭариа, Алина Ачба, Шамиль Аӡынба, Гәырам Гәымба, Иури Кәыҵниа, Геннади Аламиа, Енвер Шулумба, Виачеслав Сақаниа, Ҭенгиз Габуниа, Лили Ҳагба, Едуард Квираиа, Вахтанг Аҧҳазоу, Валентина Габниа, Ҳаири Қәҭарба, Дмитри Габалиа, Леуард Мхонџьиа уҳәа егьырҭгьы.

Аилацәажәара цәаҳәа ҟаҧшьны иагәылсуан «Аҳәынҭқарратә бызшәазы» Азакәан шаҧҵоугьы, аҧсшәа ҳәынҭ­қарратә бызшәаны ишыҧхьаӡоугьы, уи ахархәареи аларҵәареи рхаҵгылара аганахьала ахьыс­ҳарақәа шыҟоу, ус ианца аҭагылазаашьа еиҳагьы ишуадаҩхо.

Ажәлар, амилаҭ ҧсыс ирхоу, рҧеиҧш змадоу рхатәы бызшәа ауп. Ахеиқәырхара анрылымша етноск аҳасабала ибжьаӡуеит. Абри иахьынӡахәҭоу агәцаракра амамкәа аҭагы­лазаашьа шьақәгылар, ҳәарада, ашәарҭара ду иҭагылоит. Ҳажәлар шәышықәсала иззықәҧоз, рҵеицәа рыҧсадгьыл ахьчара рхы зақәыр­ҵоз, ари адунеи аҟны аҧсуа иаҭәашьоу иҭыҧ аиқәыр­харазоуп. Аҳәынҭ­қарра амазаара хықәкыс иамоугьы ҳажәлар рхеиқәыр­хараҿы уасхыр ҕәҕәаны ишыҟоу ашьақәырҕәҕәаразы ауп. Ҳәара аҭахума, аҧхьаӡа иргыланы иҭҵааны ишьақәыр­гылатәуп ауаажә­ла­рраҿы ахатәы бызшәа иааннакыло аҭыҧ, насгьы уи ахархәара зыҧсыҽхо, ҧынгылақәас ицәырҵуа, урҭ ӡбышьас ирымоу амҩақәа. Зегьы еицыр­дыруеит ажәеицааира «Абызшәа аныҟам, ажәларгьы ыҟам». Ари гәҽанҵагоуп, даараӡа узызхәыцша, ишәа-иза узызнеиша акоуп. Избан акәзар иуеилнаркаауа рацәоуп.

Аиқәшәараҿы иаахтны ирҳәон ахатәы бызшәа ашәарҭара ишҭагылоу, уи инамаданы ҳажәлар рҧеиҧшгьы ашәарҭара ишҭанаргыло. Аҭагыла­заашьа арҽеиразы, хымҧада, араҟа амчқәа зегьы еилаҵатәуп.

В. Баалоу