«Аԥсны шәыдныҳәалара ҳаигәырӷьоит. Шара ҳаззыԥшу ҩызоуп. Ҳтәылақәа рыҩбагьы русеицура, Урыстәылатәи Афедерациа асубиектқәа рҟны аимадарақәа Аԥсни Урыстәылеи рыжәларқәа ринтересқәа ирықәшәоит», – иҳәеит Ахада.

Ваге Петросиан Аслан Бжьаниа ҭабуп ҳәа иеиҳәеит иԥхаӡа адкыларазы, иҳәеит иаара хықәкыс ишамоу арегионбжьаратә усеицура арҭбаара, уи ахырхарҭа ҿыцқәа разгәаҭара.

«Гәык-ԥсыкала ҭабуп ҳәа шәасҳәарц сҭахуп ааԥхьареи иԥхаӡа адкылареи рзы, Аԥсныҟа Архангельсктәи аобласт аделегациа раара аиҿкаара шәахьадгылаз азы. Инацымҵакәа уаҩы иҳәар ауеит, аиҩызцәа қьиақәа ҩыџьа реиԥылара аформат ала имҩаԥысуеит ҳәа ҳаиқәшәара. Шәареи ҳареи еишьцәоу қалақьқәаны иԥхьаӡоу Аҟәеи Архангельски русеицуреи реиҩызареи рганахьала аҭоурых бзиа ҳамоуп», – иҳәеит Петросиан. Уи игәахәарақәа ртәы иҳәеит, иазгәеиҭеит Аԥсны имҩаԥысуа аиҭакрақәа шџьеишьауа.

Аганқәа рылацәажәеит аусеицура еиуеиԥым ахырхарҭақәа, иагьышьақәдырӷәӷәеит Аԥсни Архангельсктәи аобласти реимадарақәа рырҿиареи рырӷәӷәареи интересс ишрымоу. Аиԥылара ахыркәшамҭаз Бжьаниеи Петросиани агәалашәаратә ҳамҭақәа еимырдеит.

Иара убас Аԥсны иҟоу Урыстәыла Ацҳаражәҳәарҭаҿы имҩаԥысит Аԥсны Аҳәынҭқарраҿы Урыстәыла аусқәа аамҭала знапы иану Максим Литвинови Архангельсктәи аобласт агубернатор актәи ихаҭыԥуаҩ – агубернатор Иусбарҭеи Аиҳабыреи рнапхгаҩы Ваге Петросиани реиԥылара.