Ареспубликатә ҳәынҭқарратә усҳәарҭа «Аҧснымедиа»
Аслан Бжьаниа усуратә визитла Ҭаҭарсҭан даҭаахьеит 2022 шықәса ииуль 16 азы.
Ҭаҭарсҭан Ахада Русҭам Минниханов раҧхьаӡа акәны Аҧсны аофициалтә визитла даҭааит 2015 шықәса октиабр 1 азы.
Иара убри аҽны Аҧсны Ахада Аслан Бжьаниа Аҧсныҟа иааз Ҭаҭарсҭан Ахада Русҭам Минниханови рыхәаҧшит Гагратәи Гәылрыҧшьтәи араионқәа рҟны аинвестициатә аобиектқәа.
Русҭам Минниханов Аҧсныҟа иаара хықәкы хадас иамоу аекономикеи атуризми рганахьала аимадарақәа рырҕәҕәара ауп.
«Иахьа дсасны даҳҭоуп аешьаратә Республика Ҭаҭарсҭан ҳаҭыр зқәу анапхгаҩы. Ҳаизыҟазаашьақәа акыр рхыҵуеит. 1992-1993 шықәсқәа рзы Аҧсны жәлар Рџьынџьтәылатә еибашьра аан, Ҭаҭарсҭан ҳҳәынҭқарра хәызмаӡам ацхыраара анаҭон. Убасҟантәи аамҭазы ҳтәылақәа рнапхгаҩцәа Владислав Арӡынбеи Минтимер Шаимиеви рыбжьара ишьақәгылаз аиҩызаратә еизыҟазаашьақәа иахьагьы ирыцҵахоит. Ҳара ҳҽазаҳшәоит ҳусеицура уаҩытәыҩсала, економикала ихаҭәааларц», – иҳәеит Аҧсны Ахада Аслан Бжьаниа.
Русҭам Минниханов иазгәеиҭеит, ареспубликақәа рыҩбагьы рыжәларқәа даара ишеизааигәоу, Урыстәылазы аиҧш Аҧсны азгьы имариамыз ҧшьынҩажәижәабатәи ашықәсқәа инадыркны. «Раҧхьатәи ҳхада Минтимер Шаимиеви Владислав Арӡынбеи алшарақәа рыҧшааит дара-дара еицхырааларц азы. Ҳәарас иаҭахузеи, ари аиҩызара еиқәхеит. Даара иаҳҭахуп абраҟа ҳаҟазарц, иара убас ҳара ҳреспублика ала Урыстәыла иҟазарц аҧсуа бизнесгьы. Иахьа акыр ҳныҟәеит, ҳрыхәаҧшит аиланхарҭақәа, иаабеит аобиектқәа. Аҧсны Ахада Аслан Гьаргь-иҧа иҟнытә иахьа исаҳаз апланқәа даара ибзиоуп. Агәра згоит, иаарласны Аҧсны ҭыҧ ҧшӡараны ишыҟалауа, избанзар Ҳазшаз уи шәара ишәиҭеит. Мацара иаҭаху агәақәкра, ахшыҩеилаҵара ауп», – иҳәеит Ҭаҭарсҭан Ахада.
Русҭам Минниханов иҳәеит аинвестпроект бзиақәа рацәаны ишибаз. Уи иажәақәа рыла, даара акраҵанакуеит адгьылҵакырақәа иааидкыланы, насгьы ииашаны рырҿиалара.
Аҧсны атуристцәа здызыҧхьалаша ахаҿсахьа амазароуп, абраҟа зегьы ыҟоуп ауаа рыҧсы ршьаларц, агәахәара роуларц азы», – иҳәеит Ҭаҭарсҭан Ахада.
Иара иазхеиҵеит адунеи аҟны аҧсуа мандаринақәа иреиҕьу шимбац, Аҧсны аҳауеи аҧсабареи ракәзар, даара ишыманшәалоу.
«Сара аҩызцәа ирыдызгалеит ҳҧышәагьы рхы иадырхәаларц. Ҳаргьы активла иҳарҿиоит аинфраструктура, аҧшаҳәа еиҿаҳкаауеит, ҳхы иаҳархәоит жәларбжьаратәи аҧышәагьы. Убри шәымаҳдарц ҳҭахуп. Ҭаҭарсҭан – туристтә регион дууп, Аҧсны иаҭаху хыҧхьаӡара рацәала аалыҵқәа раашьҭра иазхиоуп», – иҳәеит Минниханов.
Ҭаҭарсҭан Ахада аешьаратә аҧсуа жәлар ирзеиҕьишьеит ашәҭыкакаҷра.
«Агәра згоит, Аҧсны анапхгара рыгәҭакқәа аҧеиҧш шроуа, иагьшыҵабыргхо», – иҳәеит иара.
