Адныҳәалараҿы иаҳәоит:
«Ҳаҭыр зқәу ҳауаажәлар! Гәык-ҧсык ала ишәыдысныҳәалоит Қырҭтәыла Аҳәынҭсовет ар рҟнытә Гагра араион ахақәиҭтәра Амш ҩежәижәаба шықәса ахыҵра. Даараӡа иазыҟаҵаз шьахәлагьы инагӡаз Гагратәи ажәылара ақырҭуа агрессор ииааира ааигәатәра алзыршаз акрызҵазкуа ахҭысқәа ируакны иҟалеит. Аидгылареи, аибашьцәа ргәымшәареи символра азызуаз ажәылара акырӡа аҵанакуан ҳажәлар рырра-политикатәи рморалтәи ҭагылазаашьазы, аҕа ииааиразы агәрагара еиҳагьы иарҕәҕәеит.
Ҳара ҳазгәдууп ахақәиҭра иазықәҧоз аибашьцәа ргәымшәареи рфырхаҵареи, ҳгәалашәараҿгьы еснагь рыҧсы ҭазаауеит ҳадгьыл гәакьа зхы ақәызҵаз, иахьатәи амш аҟынӡа изымааиз зегьы.
Акыр иаҧсоу аветеранцәа! Шәара – досу шәыбзоурала Аҧсны ауаажәлар нхоит-инҵуеит ажәҩан цқьа аҵаҟа зхы иақәиҭу ихьыҧшым аҳәынҭқарраҿы!
Ҳаҭыр зқәу ҳауаажәлар! Ишәыдысныҳәалоит акырӡа зҵазкуа ари арыцхә, ишәзеиҕьасшьоит аҭынчреи аизҳазыҕьареи!»
