Уаҟа ахәҭакахьала иазгәаҭоуп:

Иахьа, Аҧсны Аиааиреи Ахьыҧшымреи Рымш аназгәаҳҭо, ҳадгьыл аҟны аҭоурыхтә иашара аиҭашьақәыргылара амш аҽны, гәахәара дула иҳадаҳкылеит Москва иҟалаз ахҭыс – Донецктәи, Лугансктәи Жәлартә Республикақәа, Запорожиетәи, Херсонтәи аобластқәа Урыстәылатәи Афедерациа аилазаарахь рыдкыларазы аиқәшаҳаҭра анапаҵаҩра иадҳәалоу ахҭыс.

Акыр иаҧсоу аҩызцәа! Иахьа ҳара лабҿаба иаабеит шәыдгьыл аҟны аҭоурыхтә иашара ашьақәырҕәҕәара. Шәгәырҕьара шәыцеиҩаҳшоит. Еиуеиҧшым апровокациақәа, аҧсҭазааразы ишәарҭаз аҭагылазаашьақәа шыҟазгьы, Урыстәыла ацынхаразы зегьы ишәымаз агәаҳәара шәеицҿакны ареферендумқәа рҟны иаашәырҧшит. Донецктәи Лугансктәи Жәлартә Республикақәеи Запорожиетәи Херсонтәи аобластқәеи ирыланхо ауааҧсыра доуҳала ракзаара ҧгара ақәӡам. Гәык-ҧсык ала ишәыдысныҳәалоит ари амш! Иҟазааит аҭынчра, аинҭәылара, аизҳазыҕьара!