Аԥсны Аԥыза-министр Алеқсандр Анқәаби Урыстәылатәи Афедерациа аекономикатә рҿиара аминистр ихаҭыԥуаҩ Дмитри Вольвачи аусуратә еиԥылара мҩаԥыргеит. Уи иалахәын асоциал-економикатә усеицуразы Аԥсни Урыстәылеи Реиҳабырабжьаратә комиссиа алахәылацәа, Урыстәыла аекономикатә рҿиареи, аенергетикеи, атранспорти, агәабзиарахьчареи, аџьеи, аҵареи рминистррақәа, анагӡаратә мчра афедералтә усбарҭақәа рхаҭарнакцәа.
Аиԥылара рхы аладырхәит Аԥсны иҟоу Урыстәыла Ацҳаражәҳәаҩ ҷыда Михаил Шургалин, Аԥсны иҟоу Урыстәыла Ахәаахәҭратә хаҭарнак Залина Кобесова.
Аганқәа рылацәажәеит Аԥсны Аҳәынҭқарра азакәанԥҵареи Урыстәылатәи Афедерациа азакәанԥҵареи реишьаршәаларала Урыстәылатәи Афедерациеи Аԥсны Аҳәынҭқарреи рзеиԥш социалтә, економикатә қәыԥшылара ашьақәыргылара Апрограмма анагӡара, Аԥсны асоциал-економикатә рҿиара иазку Аинвестициатә программақәа 2024 шықәсазы рынагӡара, аекономика аусхкқәа аҳәынҭқарра аганахьала рыдгылара, Аԥсны иазымхо афымцамчы ала аиқәыршәара уҳәа азҵаарақәа.
Урыстәылатәи аделегациа Аԥсны иҟан ииун 15 азынӡа. Абри аамҭа иалагӡаны ирҭааит Аԥсны асоциал- економикатә рҿиара иазку Аинвестициатә программақәа рыла идыргыло аобиектқәа. Иара убас В.Арӡынба ихьӡ зху Жәларбжьаратәи аҳаиртә баӷәаза «Аҟәа» аусура аларгара иазку аинвестициатә проект ианагӡашьоу ахылаԥшразы аусуратә гәыԥ аилатәара мҩаԥыргеит.
Рашәара 14 азы Аинвестициатә программа ахарџь ала зыргылара азгәаҭоу аобиектқәа рҭаара иалагеит Ареспубликатә хәыҷтәы хәышәтәырҭа ала. Иарбоу апроект анагӡара хацыркын ҳазҭоу амзазы.
Ари аусмҩаԥгатә ахарџь – 651,9 млн. мааҭ рҟынӡа инаӡоит. 65 шьҭаларҭа ахьыҟало, зымҽхак 4550,79 метрԥшьыркца рҟынӡа инаӡо, х-еихагылакны иҟало ахыбра хышықәса рыла аргылара азԥхьагәаҭоуп.
Апроект иазоужьу аҵакыра 10 850 метрԥшьыркца рҟынӡа инаӡоит. Ахәышәтәырҭаҿы иҟалоит адиагностикатә ҟәша, аԥҟаратә ҟәша, ихадоу арзҩыдаратә ҟәша, алабораториа, амаҵзура-бзазаратә уадақәа, ахәыҟаҵарҭа.
Ахыбра актәи аихагылаҿы иҟалоит адкыларҭа, ашәҟәҭаҩратә ҟәша, ахәаԥшратә кабинетқәа, арентген-диагностикатә ҟәша, аклиника-диагностикатә ҟәша.
Дмитри Вольвач ахәыҷқәа амедицинатә цхыраара рыҭаразы иреиӷьу аҭагылазаашьақәа раԥҵара азҵаара аҵак ду змоу акакәны иԥхьаӡоуп ҳәа инаҵшьны иазгәеиҭеит. Иарбоу аӡбамҭақәа ақәыршаҳаҭра роуит Урыстәылатәи Афедерациа Анапхгареи Ареспублика Аԥсны Анапхгареи рҿы. Акыр аҵанакуеит, Ареспубликатә хәышәтәырҭа акомплекс аҿы ахәыҷтәы хәышәтәырҭа аргыларала иаку амедицинатә комплекс ахьаԥҵахо.
Иарбоу аобиект аҿы аделегациа ирԥылеит атәыла агәабзиарахьчара аминистр Едуард Быҭәба, Ареспубликатә хәышәтәырҭа аҳақьым хада Ерик Ҳаҭхәа, Аилазаара «КДК ДЕВЕЛОПМЕНТ» ахаҭарнакцәа.
Рашәара 14 азы иацҵахеит атәыла Аԥыза-министр Алеқсандр Анқәаби Урыстәылатәи Афедерациа аекономикатә ҿиара аминистр ихаҭыԥуаҩ Дмитри Вольвачи русуратә еиԥылара. Уи иара убас иалахәын асоциал-економиатә усеицура азы Аԥсни-Урыстәылеи Реиҳабырабжьаратә комиссиа ахаҭарнакцәеи Урыстәыла анагӡаратә мчра афедералтә усбарҭақәа рхаҭарнакцәеи.
Аганқәа рзааҭгылеит иааиуа ҭагалан-аӡынтәи аамҭазы афымцамч азымхара азԥхьагәаҭареи уи ахарҭәаара амеханизмқәеи ирыдҳәалоу апроблемақәа.
Аспециалистцәа хазы игоу аконсультациақәа мҩаԥыргеит Аԥсны афымцамчи атранспорти Рминистрраҿы.
Аганқәа русуратә гәыԥқәа аусеицура аусхкқәа рыла имҩаԥгаз ҩымштәи аконсультациақәа реихшьалақәеи ааигәатәи аперспективазы азԥхьагәаҭарақәеи ҟарҵеит. Аԥсны Аԥыза-министр Урыстәылатәи аган иҟанаҵо аметодикатә, абжьгаратә дгылареи, аусеицуреи рзы иҭабуп ҳәа иҳәеит.
