Аԥсуа боксиор дықәгылон Урыстәылатәи еизгоу акоманда даланы 48 килограмм зкапануа ркатегориаҿы. Ачемпионат мҩаԥысуан Ҭырқәтәыла, Анталиа. Аҳәынҭқарра Ахада аспортсмен қәыԥш Иааира идиныҳәалеит, аспорт аҟны аԥхьаҟагьы ақәҿиарақәа изеиӷьаишьеит.

«Аферым, уара! Уқәҿиарақәа ҳрылагәырӷьоит. Иара убасҵәҟьа ашкол аҿгьы ибзианы аҵара уҵалароуп», – иҳәеит Аслан Бжьаниа уи ақәыԥш имоу аҽадцалара, имчқәа дахьрықәгәыӷуа хшыҩзышьҭра азуны.

Абоксиор Ахада дақәиргәыӷит ибзианы аҵара шиҵало, иара убас иҟазара шааирԥшуа анаҩстәи аспорттә усмҩаԥгатәқәа рҟны.

Абоксиор иазыҟаҵаҩ Ҭеимураз Гьергьедаа Ахада ҭабуп ҳәа иеиҳәеит аспорт иаиҭо ацхыраареи адгылареи рзы. «Ари таитәи абокс мацара акәымкәа, аспорт егьырҭ ахкқәагьы ирыҵаркуеит. Ҳара иаҳныруеит атәыла анапхгара аҿар рыҿиаразы акырӡа зҵазкуа ахырхарҭа – аспорт разнеишьа. Иҭабуп», – иҳәеит иара.

Иара убас аиԥылара иалахәын Аԥсны Жәлар Реизара адепутат Асҭамыр Гьерхьелиа, абоксиорцәа рклуб  «Гьаргь Аиааирагаҩ» анапхгаҩы Коба Гогохиа.

Аиԥылараҿы ирылацәажәеит аҳәынҭқарраҿы афизкультуреи аспорти рырҿиара хра злоу азҵаарақәа.